بھارت اسرائیل راڈار معاہدہ

اس معاہدے کے تحت اسرائیل بھارت کو قبل از وقت چوکنا کر دینے والے تین راڈار فراہم کرے گا۔

اسرائیل کا تیار کیا ہوا یہ راڈار نظام روسی جنگی جہازوں پر نصب کیا جا سکے گا۔بھارتی وزارت دفاع کے ترجمان کے مطابق روسی جہازوں پر نصب کرنے کے لیئے اسرائیل پہلے یہ جہاز ازبکستان خریدے گا۔ جن میں نئے انجن روس میں لگاۓ جائیں گے جب کہ فیلکن راڈاروں کی تنصیب کا عمل اسرائیل میں طے پاۓ گا۔

اسرائیلی کابینہ نے اس معاہدے کی منظوری گزشتہ اتوار کو دے دی تھی اور بھارت کی جانب سے اس پر جمعہ کو دستخط کیےگئے۔

بھارتی وزارت دفاع کے ترجمان نے بی بی سی کو بتایا کہ فیلکن نامی یہ راڈار بھارت کو آئندہ چار برسوں میں موصول ہو جائیں گے۔ اور اب وقت ہے کہ بھارت اس معاہدے کی پیشگی رقم ادا کر دے۔

بھارت کے حریف پاکستان کا کہنا رہا ہے کہ بھارت مسلسل ہتھیاروں کی خریداری کرتا رہتا ہے۔دفاعی مبصرین کا کہنا ہے کہ فیلکن راڈار کے نظام سے بھارت کو خطّے میں ہتھیاروں کے میدان میں اپنے حریفوں چین اور پاکستان پر سبقت حاصل ہو جاۓ گی۔