سری لنکا میں اگلے ماہ ہونے والے انتخابات کے دو سو اسّی سے زائد بدھ راہبوں نے اپنا انتخابی منشور جاری کردیا ہے جس میں ملک کو ایک ’دیانتدار ریاست‘ میں بدل دینے کا وعدہ کیا گیا ہے۔ ’قومی ورثہ جماعت‘ سے تعلق رکھنے والے ان راہبوں کا کہنا ہے کہ ان کے مقاصد میں بدھ مت کا تحفظ اور ملک کو بدعنوانی سے پاک کرنا شامل ہیں۔ وہ سری لنکا میں تامل اقلیت کو اقتدار میں حصہ دینے کے بھی خلاف ہیں۔ راہبوں نے جزیرہ کینڈی پر واقع بدھ مت کے مقدس ترین مندر سے اپنی مہم کا آغاز کیا ہے۔ اپنی تقاریر میں انہوں نے کہا کہ تامل ٹائگرز اور حکومت مل کر سری لنکا کو تقسیم کرنے کی سازش کر رہے ہیں۔ سری لنکا میں راہبوں کے ناقدین کا کہنا ہے کہ ان کا انتخابات لڑنا صرف ’قومی ورثہ جماعت‘ کی طرف سے سستی شہرت حاصل کرنے کا ایک بہانہ ہے کیونکہ یہ جماعت اس سے قبل انتخابات میں کبھی اچھی کارکردگی نہیں دکھا سکی۔ تاہم بی بی سی کے کولمبو کے نمائندے کے مطابق بہت سے سیاستدانوں کو ڈر ہے کہ راہب ایسے ووٹروں کے لئے پرکشش ہو سکتے جو سری لنکا میں ان مرکزی جماعتوں کے خلاف احتجاج کرنا چاہتے جو کئی عشروں سے سری لنکا کی سیاست پر غالب ہیں۔ | 
یہ صفحہ دوست کو ای میل کیجیئے
پرِنٹ کریں
