صدر ارسٹیڈ کو پہلے بھی منتخب ہونے کے فوراً بعد جلاوطن ہونا پڑا تھا

ان کا کہنا ہے کہ یہ فیصلہ انہوں نے ملک کے وسیع تر مفاد میں کیا ہے تاکہ مزید خون نہ بہے۔ ان کے اعلان کے ساتھ ہی ان علاقوں میں جشن منایا گیا جہاں باغیوں کا قبضہ ہے تاہم دارالحکومت میں مشتعل ہجوم نے توڑ پھوڑ کی اور کئی جگہوں پر آگ لگائی۔ لوٹ مار کے واقعات کی اطلاعات بھی آرہی ہیں۔

ملک کی اعلیٰ ترین عدالت کے سربراہ نے آئین کے مطابق حکومت کی باگ دوڑ سنبھالنے کا اعلان کیا ہے۔

ہیٹی میں نامزد امریکی سفیر نے کہا ہے کہ ملک میں امن و امان کی صورتِ حال کو قابو میں لانے کے لئے جلد از جلد بین القوامی فوج تعینات کی جائے گی۔ جمعے کے روز تین بحری جہازوں پر موجود تین ہزار امریکی فوجیوں کو ہیٹی جانے کے لئے تیار رہنے کا حکم دے دیا گیا تھا۔

امریکہ اور فرانس نے صدر ارسٹیڈ سے اقتدار چھوڑنے کا مطالبہ کیا تھا اور آخری دنوں میں وائٹ ہاؤس نے انہیں شدید تنقید کا نشانہ بنایا۔ تاہم امریکی وزارتِ داخلہ کے ترجمان کا کہنا ہے کہ صدر کی درخواست پر امریکہ ملک سے ان کی باحفاظت رخصتی کو یقینی بنائے گا۔

ہیٹی کی خانہ جنگی کی وجہ دو ہزار میں ہونے والے انتخابات ہیں جن کے بارے میں حزبِ اختلاف کا کہنا ہے کہ ان میں دھاندلی کی گئی تھی۔ پچھلے تین ہفتوں میں باغیوں نے ملک کے زیادہ تر حصوں پر کنٹرول حاصل کر لیا تھا۔

صدر ارسٹیڈ کو پہلے بھی منتخب ہونے کے فوراً بعد جلاوطن ہونا پڑا تھا تاہم تین سال بعد امریکی فوجی مداخلت کے ذریعے وہ واپس اقتدار میں آئے۔