مسکراہٹ کی ٹھوس وجہ موجود ہے

فوربز کی ارب پتی آدمیوں کی اٹھارویں لسٹ کے مطابق مائکروسافٹ کے بانی بل گیٹس اس سال بھی 46.06 ارب ڈالر کے اثاثوں کی مالیت کے ساتھ اول نمبر پر رہے۔

ہندوستان کے اعظم پریمجی جو کے سافٹ ویئر کمپنی وپرو کے چیئرمین ہیں 6.7 ارب ڈالر کے اثاثوں کے ساتھ بدستور ہندوستان کے سب سے امیر آدمی کے درجے پر رہے۔ دنیا میں ان کا نمبر اٹھاونواں رہا۔

سٹیل کے ’بادشاہ‘ لکشمی مِٹل 6.2 ارب ڈالر کے اثاثوں کے ساتھ دوسرے امیر ترین ہندوستانی کہلائے۔ دنیا کے کل 587 ارب پتیوں میں ان کا نمبر باسٹھواں ہے۔

تریپن سالہ مِٹل دنیا کے سب سے بڑے سٹیل بنانے والے ادارے ایل این ایم کے سربراہ ہیں جس کی شاخیں دنیا کے بارہ ممالک میں پھیلی ہوئی ہیں۔

ریلائنس انڈسٹریز کے سربراہ انیل اور مکیش انبانی جو کے دونوں بھائی ہیں اس سال ارب پتیوں کی فہرست میں پینسٹھویں نمبر پر رہے۔ 2003 میں ان کا نمبر ایک سو تیئسواں تھا۔

دوسرے امیر ترین ہندوستانی

گزشتہ سال کے مقابلے میں انبانی بھائیوں کے اثاثے دوگنے بڑھ چکے ہیں۔ گزشتہ سال یہ 2.8 ارب ڈالر تھے جبکہ اب ان کی مالیت 6 ارب ڈالر ہے۔

ارب پتی گروپ میں آنے والے دو نئے ہندوستانی بھارتی گروپ کے سنیل مِٹل اور سٹرلائٹ انڈسٹریز کے انیل اگروال ہیں۔

سنیل مِٹل 2.7 ارب ڈالر کے ساتھ ایک سو چھیاسویں نمبر پر اور انیل اگروال ایک ارب ڈالر کے ساتھ پانچ سو باونویں نمبر پر ہیں۔

ادتیا برلا گروپ کے کمار منگنگلم 36 سال کی عمر میں سب سے نوجوان ہندوستانی ارب پتی بن گئے ہیں۔ ان کا نمبر ایک سو سینتالیسواں ہے۔

ادی گودریج 2.2 ارب ڈالر کے ساتھ دو سو ستترویں نمبر پر ہیں۔