فصیل کی تعمیر کے خلاف احتجاجی مظاہرہ جھڑپ میں تبدیل ہوگیا

فلسطینی حکام نے کہا ہے کہ یہ ہلاکتیں اس وقت ہوئیں جب غرب اردن کے ایک گاؤں میں اسرائیلی فوجیوں نے پتھر پھینکنے والے فلسطینی نوجوانوں پر فائرنگ کردی۔ اس علاقے میں فصیل کی تعمیر کا کام دو روز قبل شروع ہوا تھا۔

فصیل کے خلاف کئے جانے والے احتجاجی مظاہرے میں گیارہ فلسطینی زخمی ہوئے ہیں۔ مظاہرین فصیل کی تعمیر روکنے کی کوشش کررہے تھے۔ ان مظاہروں میں ہزاروں فلسطینی شامل تھے۔

اس سے قبل دو فلسطینی مسلح افراد کو اس وقت گولی مار کرر ہلاک کردیا گیا تھا جنہوں نے غزا میں اریز کے مقام پر ایک اسرائیلی فوجی کو ہلاک کیا تھا۔

اطلاعات کے مطابق مشتعل فلسطینی فصیل کی تعمیر روکنے کے لئے اسرائیلی بلڈوزروں کے آگے لیٹ گئے۔ عینی شاہدین کے مطابق اسرائیلی فوجیوں نے جواباً آنسو گیس کے شیل پھینکے، ربر کی گولیاں برسائیں حتٰی کہ مظاہرین کو منتشر کرنے کے لئے آگ کا استعمال بھی کیا۔

چوبیس سالہ علی داؤد نے بتایا کہ وہ پتھر پھینک رہے تھے جب اسرائیلی فوجیوں نے ان کی دائیں ٹانگ پر گولی ماردی۔ علی نے بتایا ’ہم انہیں اپنی زمین پر فصیل تعمیر کرنے سے روکنا چاہ رہے تھے مگر وہاں جا کر ہمیں معلوم ہوا کہ وہاں تو دو سو سے زائد اسرائیلی فوجی موجود تھے‘۔

احتجاجی مظاہروں کا سلسلہ غرب اردن کے دیگر گاؤوں تک جا پہنچا ہے۔

فلسطینی تنظیم الاقصیٰ بریگیڈ نے اریز کے مقام پر کئے گئے اس حملے کی ذمہ داری قبول کرلی ہے جس میں ایک اسرائیلی ہلاک ہوا تھا۔ اس ہلاکت کے بعد علاقے میں جھڑپ کچھ دیر تک جاری رہی اور اسرائیلی فوج نے دو فلسطینیوں کو ہلاک کردیا۔

اریز اسرائیل اور غزا کی پٹی کے درمیان سرحد پر واقع ہے۔ جنوری سے اس علاقے میں سکیورٹی بڑھادی گئی تھی جب ایک خودکش حملہ آور فلسطینی خاتون کے حملے میں چار اسرائیلی ہلاک ہوگئے تھے۔

اسرائیل نے اب اس کراسنگ کو بند کردیا ہے۔