بابری مسجد کے انہدام پر ملک بھر میں فسادات بھڑک اٹھے تھے

ہندو انتہا پسند اس مقام پر مندر کی تعمیر کے لئے مہم چلا رہے ہیں جہاں اتر پردیش میں انیس سو بانوے میں انہوں نے بابری مسجد کو گرایا تھا ۔انکا کہنا ہے کہ وہاں پہلے بھگوان رام کا مندر تھا جس کو گرا کر مسجد بنائی گئی تھی۔

انتہا پسند تنظیم وشو ہندو پریشد ، شو سینا اور بھارتیہ جنتا پارٹی جو اس وقت اپوزیشن میں تھی کے کارکنوں نے بابری مسجد گرائی تھی۔اور بی جے پی نے کئی مرتبہ اتخابات کے موقع پر اس موضوع کو اٹھایا ہے۔

لکھنؤ میں اپنے حلقے میں نامہ نگاروں سے بات کرتے ہوئے وزیرِ اعظم واجپئی نے کہا کہ رام مندر انتخابی موضوع نہیں ہے کیونکہ یہ مسئلہ لوگوں کے جذبات سے جڑا ہوا ہے ہمیں اس مسئلہ کو حل کرنا چاہیے امید ہے کہ اس سمت ہونے والی کوششیں کامیاب ہوں گی۔

وزیرِ اعظم نے کہاکہ یہ مسئلہ یا تو مذاکرات سے حل کیا جائے یا پھر عدلت کے ذریعے طے ہو ۔ وشو ہندو پریشد کا کہنا ہے کہ وہ اس معاملے میں عدالت کا فیصلہ تسلیم نہیں کریگی۔

بابری مسجد کے انہدام کے نتیجے میں ملک بھر میں فرقہ وارانہ فسادات پھوٹ پڑے تھے جس میں دو ہزار افراد ہلاک ہوئے تھے ۔یہ فسادات بھارت کی سیکولر شناخت کو انیس سو سینتالیس کے بعد سب سے بڑا خطرہ تصور کئے گئے تھے۔