ہندوستان کے بعد عالمی سطح پر اپنے فن کا لوہا منوایا

بی بی سی آن لائین کے ساتھ ایک خصوصی انٹرویو میں انہوں نے کہا کہ اس سال وہ چار سے پانچ ماہ کا عرصہ ہندوستان سے باہر گزاریں گے تاکہ اپنے بین الااقوامی منصوبوں کو پورا وقت دے سکیں۔

سینتیس سال کے شرمیلے سے رحمان نے اپنے کیرئر کا آغاز تو اشتہارات کے لیے موسیقی بنانے سے کیا تھا لیکن اب اپنی انوکھی اور مختلف دھنوں سے وہ بالی وڈ پر راج کر رہے ہیں۔

انکی پرکشش موسیقی میں روایتی ہندوستانی سازوں، مغربی جدید موسیقی اور صوفی موسیقی کا خوبصورت امتزاج دیکھنے کو ملتا ہے ۔

رحمان نے اینڈریو لائیڈ ویبر کے سٹیج ڈرامے بامبے ڈریم کی موسیقی مرتب کی تھی، جو کامیابی سے لندن میں چل رہا ہے اور اپریل میں نیو یارک میں بھی متعارف کرایا جائے گا۔ براڈوے میں چلنے والے ڈرامے کے لیے وہ دو یا تین نئے گانے تیار کر رہے ہیں۔

نیو یارک سے رحمان برمنگھم جائیں گے جہاں وہ مشہورِ عا لم برمنگھم سمفنی آرکسٹرا کو کنڈکٹ کریں گے۔انہوں نے بتایا کہ وہ نوے نوے منٹ کے دو کنسرٹ کنڈکٹ کریں گے۔

پہلا کنسرٹ انکے ان شاہکار نغموں پر مشتمل ہوگا جنہوں نے انہیں ہندوستان میں بے پناہ شہرت دی، جبکہ دوسرا کنسرٹ فارسی کے صوفی شاعر فریدالدین عطار کی مثنوی ’منطق الطیر‘ کی غنائی تشکیل پر مبنی ہوگا۔

رحمان کا کہنا ہے کہ ابھی تک انہوں نے جو کچھ کیا ہے یہ اس سے بالکل مختلف ہو گا۔