’مزید حملے ہو سکتے ہیں‘

آسٹریلیا کے وزیر خارجہ ایلگزینڈر ڈاؤنر نے اجلاس کے دوران کہا کہ جمعیۂ اسلامیہ جیسی تنظیمیں جو بالی بم دھماکوں میں ملوث تھیں اب بھی لوگوں کو بھرتی کر کے انہیں تربیت دے رہی ہیں۔ انہوں نے کہا کہ مزید حملے ناگزیر ہیں۔

امریکہ کے اٹارنی جنرل جان ایشکرافٹ نے اجلاس کے مندوبین سے کہا کہ دہشت گردی سے نمٹنے کے لئے بین الاقوامی تعاون ضروری ہے۔ تاہم انڈونیشیا کے خیال میں امریکہ خود اس سلسلے میں زیادہ کام کر سکتا ہے۔

انڈونیشیا کا امریکہ سے مطالبہ ہے کہ اسے جمعیۂ اسلامیہ کے اعلیٰ رُکن حنبلی تک جنہیں امریکہ نے نا معلوم مقام پر رکھا ہوا ہے رسائی دی جائے۔

اجلاس میں انڈونیشیا اور آسٹریلیا نے جکارتہ میں انسداد دہشت گردی کا مرکز کھولنے کا اعلان کیا جہاں معلومات کا تبادلہ ہوگا اور اہلکاروں کو دہشت گردی کے مقدمات میں تفتیش کی تربیت دی جائے گی۔