یہ صفحہ دوست کو ای میل کیجیئے		پرِنٹ کریں

افغان صدر حامد کرزئی اس سے قبل ملا عمر کی پاکستان میں روپوشی کے بارے میں بھی بیان دے چکے ہیں۔

افغانستان کے صدر حامد کرزئی نے کہا ہے کہ القاعدہ کے رہنما اسامہ بن لادن شاید زندہ اور پاکستان سے ملحقہ سرحد پر کہیں روپوش ہیں۔

کابل میں صحافیوں سے گفتگو کرتے ہوئے انہوں نے کہا کہ ان کا خیال ہے کہ حال ہی میں جاری ہونے والے ویڈیو پیغامات سے اس بات کا ثبوت ملتا ہے کہ اسامہ زندہ ہیں اور پاک افغان سرحد کے دشوار گزار علاقے میں کہیں روپوش ہیں۔

صدر حامد کرزئی کا یہ بیان ایک ایسے وقت میں سامنے آیا ہے جب پاکستان میں بعض اخبارات کے دفاتر کو ایک ایسا بیان موصول ہوا ہے جسے افغانستان کی معزول طالبان حکومت کے سربراہ ملا عمر سے منسوب کیا جارہا ہے۔

پشتو زبان میں تحریر اس پیغام میں کہا گیا ہے کہ ملک میں جاری امریکی ظلم و استبداد کی لہر جلد ہی ختم ہوجائے گی۔ پیغام میں عوام سے کہا گیا ہے کہ اس سلسلے میں طالبان کا ساتھ دیں۔ پیغام میں مزید کہا گیا ہے کہ امریکی حمایت یافتہ عبوری حکومت ملک میں جمہوریت یا امن قائم نہیں کرسکی۔

دریں اثنا، افغان دارالحکومت کابل میں قائم امریکی فوجی اڈے پر ایک مشترکہ اجلاس کے بعد پاکستان، افغان اور امریکہ کے حکام اس امر پر رضامند ہوگئے ہیں کہ افغانستان اور پاکستان کی حکومتیں ان شدت پسندوں کی سرکوبی کے لیے خفیہ معلومات کا تبادلہ کریں گی جن کے بارے میں خیال کیا جاتا ہے کہ یہ شدت پسند دونوں ممالک کی سرحد پر روپوش ہیں۔