یہ صفحہ دوست کو ای میل کیجیئے		پرِنٹ کریں

بھارت اور روس کے درمیان ایک اعشاریہ چھ ارب ڈالر کا دفاعی معاہدہ ہوا ہے جس کے تحت بھارت کو طیارہ بردار جہاز اور بارہ جنگی جہاز ملیں گے۔

یہ معاہدہ دہلی میں منعقدہ ایک تقریب میں ہوا جس میں روس کے وزیرِ دفاع سرگئی آیواناف اور ان کے بھارتی ہم منصب جارج فرنینڈس نے شرکت کی۔

روس کا کہنا ہے کہ وہ بھارت کو طیارہ بردار جہاز جس کا نام ’ایڈمرل گارشکوف‘ ہے دو ہزار آٹھ تک فراہم کر دے گا۔

روس بھارت کو اسلحہ کی ضروریات فراہم کرنے والا سب سے بڑا ملک ہے اور دونوں کے درمیان دفاعی تعاون دنوں ممالک کے درمیان تعلق کا اہم جز ہے۔

بھارتی وزیرِ دفاع کے دورۂ بھارت میں سب سے اہم بات غالباً یہی دفاعی معاہدہ تھا۔

تاہم روسی وزیرِ دفاع نے اخبارنویسوں کو اس سودے کی تفصیلات بتانے سے اجتناب کیا۔ ان کا کہنا تھا کہ فوجی اور تکنیکی تعاون بہت حسساس معاملہ ہے اور وہ اس پر مزید کوئی تبصرہ نہیں کریں گے۔

لیکن روسی وزیر نے یہ ضرور کہا کہ بھارت کے ساتھ ہونے والا معاہدہ تاریخی ہے اجبکہ بھارتی وزیر دفاع نے کہا کہ یہ ایک تاریخ ساز موقع ہے۔

بھارت کو ملنے والا طیارہ بردار جہاز انتیس سال پرانا جہاز ہے جسے روس نے انیس سو چورانوے میں الگ کر لیا تھا۔

بھارت میں کچھ لوگوں نے اس معاہدے کے حوالے سے ماضی میں بھی تنقید کی ہے اور کہا ہے کہ اتنے پرانے جہاز پر زیادہ رقم خرچ کی گئی ہے۔