چین کا فردِ واحد چین کے افغانستان میں امن مشن کا سارے کا سارا بوجھ جنوبی چین میں رہنے والے ایک پولیس والے کے کاندھے پر ہو گا۔ چین کے خبر رساں ادارے ژینوا کے مطابق ژانگ منگ چین میں وہ واحد شخص ہیں جس کو افغانستان میں بین الاقوامی امن مشن میں حصہ لینے کے لیے چنا گیا ہے۔ چین کی افغانستان کے ساتھ ایک چھوٹی سی سرحد لگتی ہے اور ژانگ منگ یہاں منشیات کی سمگلنگ کے خلاف جنگ میں مدد دیں گے۔ وہ بین الاقوامی ادارے کے ساتھ اپنی نوکری آج سے شروع کر رہے ہیں۔ ژینوا کے مطابق ژانگ منگ اپنے مقامی صوبے ہینان میں غیر قانونی منشیات کی تجارت کی روک تھام کے سلسلے میں کافی تجربہ رکھتے ہیں۔ اگرچہ چین نے بوسنیا، مشرقی تیمور اور لائبیریا میں پولیس آفیسر بھیجے تھے لیکن اس کے علاوہ اس کا بین الاقوامی امن آپریشنوں میں کوئی خاص کردار نہیں ہے۔ یہ واضح نہیں ہو سکا کہ چین افغانستان میں ایک رکنی مشن کیوں بھیج رہا ہے تاہم مبصرین کا کہنا ہے کہ اس سے وہ علامتی طور پر اپنے ہمسائے کی مدد کرنا چاہتا ہے۔ | 
یہ صفحہ دوست کو ای میل کیجیئے
پرِنٹ کریں
