یہ صفحہ دوست کو ای میل کیجیئے		پرِنٹ کریں

براہ راست انتخاب کا مطالبہ عراق میں شیعوں کی طرف سے کیا گیا ہے

امریکہ نے کہا ہے کہ وہ عراق میں اقتدار کی منتقلی کے منصوبوں کو اکثریتی شیعہ فرقے کی مخالفت کے پیش نظر تبدیل کرنے کے لیے تیار ہے۔

عراق میں امریکی انتظامیہ کے سربراہ پال بریمر نے امریکی صدر کی جارج بش سے ملاقات کے بعد کہا کہ شعیوں کے اعتراضات کو دور کیا جاسکتا ہے۔

بریمر اور بش کی ملاقات عراق اکثریتی شیعہ فرقے کے رہنما آیت اللہ سیستانی کی طرف سے براہ راست انتخابات کرانے کے مطالبے کے بعد عمل میں آئی۔

پال بریمر نے کہا کہ وہ آیت اللہ سیستانی کی بڑی قدر کرتے ہیں اور ان کے ساتھ بہت ساری باتوں پر اتفاق ہو سکتا ہے۔

انہوں نے کہا کہ واشنگٹن شیعہ فرقے کے اعتراضات دور کرنے کے لیے اپنے منصوبے میں رد و بدل کر سکتا ہے۔ تاہم انہوں نے کہا کہ یہ مشکل نظر آتا ہے کہ اقتدار کی منتقلی سے پہلے براہِ راست انتخابات ہو سکیں۔

حکام کے مطابق صدر بش اقتدارکی منقتلی کے لیے علاقائی اجلاسوں کے ذریعے آئندہ عراقی پارلیمنٹ کے ارکان کے انتخاب کے طریقے کار میں ردوبدل کرنے کے لیے تیار ہیں۔ تاہم یہ واضح نہیں ہے کیا یہ اقدام شیعہ اکثریتی فرقے کو مطمئن کرنے کے لیے کافی ہوں گے۔

واشنگٹن میں بی بی سی کے نامہ نگار کا کہنا ہے کہ اگر صدر بش مقررہ ڈیڈ لائن تک عراق میں اقتدار کی منتقلی میں کامیاب نہ ہو پائے تو اس کا اثر نومبر میں ہونے والے امریکی صدارتی انتخابات پر پڑ سکتا ہے جس میں جارج بش دوبارہ امریکی صدر منتخب ہونے کی کوشش کریں گے۔

پال بریمر نے کہا ہے کہ وہ پیر کو اقوامِ متحدہ کے سیکریٹری جنرل کوفی عنان سے نیو یارک میں ملاقات کریں گے تاکہ اقتدار کی منتقلی میں اقوامِ متحدہ کے کردار کے بارے میں بات کر سکیں۔

دریں اثنا ترکی نے کہا ہے کہ اگر عراق میں لسانی بنیادوں پر فیڈریش بنائی گئی تو عراق میں مزید تباہی پھیلے گی۔

ترکی کے ڈپٹی چیف آف اسٹاف نے کہا ہے کہ اقتدار کی منقتلی کے بعد اگر عراقیوں نے فیڈرل طرز کا نظام نہیں اپنایا تو بہتر ہوگا کہ یہ جغرفیائی بنیادوں پر ہو۔ انہوں نے کہا کہ موجودہ اٹھارہ صوبوں کی بنیاد پر اگر فیڈرل نظام بنایا جائے تو یہ سب سے زیادہ مستحکم نظام ہو گا۔

کرودوں کی طرف سے شمالی عراق میں پائے جانے والے تیل کے ذخائر کے بارے میں مطالبات کی بلاواستہ بات کرتے ہوئے انہوں نے کہا کہ قدرتی وسائل پر مجموعی حق ہونا چاہئے۔