یہ صفحہ دوست کو ای میل کیجیئے		پرِنٹ کریں

پارلیمانی اراکین کا احتجاج جاری ہے

ایرانی صدر محمد خاتمی نے قدامت پسندوں کو دھمکی دی ہے کہ وہ اور ان کی تمام انتظامیہ مستعفی ہو جائے گی۔

صدر خاتمی نے یہ دھمکی دیتے ہوئے مطالبہ کیا ہے کہ آئندہ ماہ ہونے والے انتخابات میں اصلاح پسندوں پر عائد کی جانے والی پابندیاں ختم کی جائیں۔

تہران سے بی بی سی کے جم میور کے مطابق انہوں نے اصلاح پسندوں کے خلاف دی جانے والی رولنگ کو متعصبانہ قرار دیا ہے۔

تاہم انہوں نے امید ظاہر کی ہے کہ بات چیت سے مسئلے کا حل تلاش کر لیا جائے گا۔

ایران میں پارلیمان کی نگرانی کرنے والی کونسل ’شورائے نگہباں‘ اب ان تین ہزار سے زائد اپیلوں کا جائزہ لے رہی ہے جو امیدواروں کی چھان بین کے دوران مشترد کیے جانے والے امیدواروں کی جانب سے دائر کی گئی ہیں۔

شورائے نگہباں ایران کا وہ ادارہ ہے جو ایرانی پارلیمنٹ اور نظام کے اسلامی اصولوں کے مطابق ہونے کو یقینی بناتا ہے۔

حکومت کے اندر اصلاح پسندوں نے پہلے ہی یہ واضح کر دیا ہے کہ اگر شورائے نگہباں نے انتخابات پر عائد کی جانے والی پابندیاں بہ اٹھائیں تو وہ مستعفی ہو جائیں گے۔

تاہم اب ایرانی صدر نے واضح طور پر کہہ دیا ہے ’ہم جائیں گے تو سب ساتھ جائیں گے اور رہیں گے تو سب ساتھ رہیں گے۔‘