یہ صفحہ دوست کو ای میل کیجیئے		پرِنٹ کریں

حال ہی میں کولمبیا کے ایک فلیٹ میں رہنے والوں کے لئے ڈاکیہ ایک غیر متوقع ڈاک لایا۔ یہ ڈاک گتے کا ایک بڑا سا ڈبہ تھی اور اس ڈبے میں کوئی تحفہ تھا نہ کوئی اور چیز بلکہ اس میں ایک انسان تھا اور انسان بھی وہ جسے کوئی اگر نقب زن کہے گا تو کوئی ڈاکو یا چور۔

ہوا یوں کہ چوبیس سالہ یہ چور گتے کے بنے ہوئے ایک نسبتاً بڑے ڈبے میں بیٹھ گیا اور اس نے کسی طرح یہ بات یقینی بنا لی کہ یہ ڈبہ میڈلن کے اس علاقے کے ایک فلیٹ میں بھیج دیا جائے جہاں امراء رہتے ہیں۔

لیکن جب سکیورٹی والوں کو گتے کا یہ وزنی ڈبہ اٹھانے میں مشکل پیش آئی تو انہیں خوف ہوا کہ کہیں ڈبے میں بم نہ ہو۔ لہذٰا وہاں فوراً پولیس طلب کر لی گئی۔

جونہی پولیس والوں نے ڈبے کا معائنہ شروع کیا، ایک ہاتھ جس میں چاقو تھما ہوا تھا اچانک گتے کے ڈبے کو چیرتا ہوا باہر نکلا اور اندر سے آواز آئی ’میرا دم گُھٹ رہا ہے۔‘

پولیس کے ایک ترجمان نے رائٹرز نیوز ایجنسی کو بتایا کہ حفاظتی گارڈز یہ سمجھے تھے کہ ڈبے میں کوئی بم ہے لہذا پہلے پولیس وہاں پہنچی اور پھر بم ناکارہ بنانے والوں کو بلایا گیا۔

جب ڈبہ کھولا گیا تو اندر سے رسہ، ایک پستول، ایک نقاب اور ایک سہما ہوا نقب زن برآمد ہوا جس کی سانس پھول رہی تھی۔

نقب زن تو خیر پکڑا ہی گیا لیکن جس گھر میں یہ ڈبہ بھیجا گیا تھا وہاں کی ملازمہ کے لئے بھی یہ دن بہت خراب ثابت ہوا کیونکہ اسے فوری طور پر ملازمت سے فارغ کر دیا گیا اور اس کی وجہ یہ تھی کہ ڈبہ اس خادمہ کے نام پر بھیجا گیا تھا۔ تاہم پولیس نے اسے ملزم کا ساتھی قرار نہیں دیا۔

اور اب-----اب کولمبیا کی پولیس مقامی لوگوں کو خبردار کر رہی ہے کہ وہ چوکنا رہیں اور خیال رکھیں کہ کہیں انہیں بھی کوئی بڑی سی چیز تو نہیں بھیجی جا رہی حالانکہ لگتا نہیں کہ چور کا راز کھلنے پر نقب لگانے کے لئے کوئی یہ طریقہ آزمانے کی کوشش کرے گا۔