افغانستان میں نیا امریکی آپریشن  | | طالبان کے خلاف اب تک کی جانے والی کارروائیوں میں خاطر خواہ کامیابی حاصل نہیں ہو سکی | |
افغانستان کے مشرقی علاقے خوست میں امریکی فوج نے طالبان کے خلاف ایک بڑی کارروائی کا آغاز کیا ہے جس میں سینکڑوں امریکی چھاتہ بردادر فوجی حصہ لے رہے ہیں۔ امریکی حکام کے مطابق خوست میں کی جانے والی یہ کارروائی امریکی فوج کے آپریشن ’ ایوالانچ‘ کا حصہ ہے جس کے بارے میں کہا جا رہا ہے کہ یہ امریکی فوج کے افغانستان پر حملے کے بعد سب سے بڑی عسکری کارروائی ہے۔ امریکی فوج نے یہ کارروائی پاکستان سے ملحقہ علاقوں میں طالبان تحریک کے دوبارہ منظم ہونے کی اطلاعات کے بعد شروع کی ہے۔ چند روز قبل کابل کے جنوب میں گردیز کے علاقے میں امریکی فوج کے ایک حملے میں نو بچے سمیت دس افراد ہلاک ہو گئے تھے۔ امریکی فوج نے دعوی کیا تھا کہ یہ حملہ طالبان کے ایک سرکردہ رہنما ملا وزیر کو ہلاک کرنے کے لیے گیا تھا۔ تاہم امریکی فوج اس خبر کی تصدیق نہیں کر سکی کہ آیا اس حملے میں طالبان کے مطلوبہ رہنما ہلاک ہوئے یا نہیں۔ آپریشن ایوالانچ میں دو ہزار کے قریب امریکی فوجی حصہ لیے رہے ہیں۔ ابھی تک کی جانے والی کارروائی کے بارے میں کوئی تفصیل معلوم نہیں ہو سکی۔ ایک امریکی کرنل نے کہا کہ وہ سردیوں اور برفباری کے آغاز سے پہلے طالبان کا صفایا کرنا چاہتے ہیں۔ بی بی سی کے نامہ نگار کرسپن تھورولڈ نے کہا کہ اس سے پہلے طالبان کے خلاف کی جانے والی کارروائیوں میں کوئی خاطر خواہ کامیابی حاصل نہیں ہوئی۔ افغانستان میں امریکی سفیر زلمے خلیل زاد نے کہا کہ گردیز میں چند روز قبل کئے جانے والے حملے کا مقصد ایک طالبان رہنما کو ہلاک کرنا تھا لیکن اس میں کامیابی حاصل نہیں ہو سکی۔ امریکی فوج کو یہ یقین ہے کہ انہوں نے اسی گھر کو نشانہ بنایا تھا جہاں ملا وزیر کی موجودگی کی اطلاع ملی تھی۔ تاہم وہ بات یقینی طور پر نہیں کہ سکتے کہ کیا اس حملہ میں وہ ملا وزیر کو ہلاک کرنے میں کامیاب ہوئے ہیں یا نہیں۔ افغان صدر اور اقوام متحدہ نے نو بچوں کی ہلاکت کے بارے میں افسوس کا اظہار کیا تھا اور اس کی شدید مذمت کی تھی۔ | 
یہ صفحہ دوست کو ای میل کیجیئے
پرِنٹ کریں
