یہ صفحہ دوست کو ای میل کیجیئے		پرِنٹ کریں

اس منصوبے کی تیاری کا سہرا اسرائیل کے سابق وزیر انصاف یوسی بیلین اور سابق فلسطینی وزیر اطلاعات عبد ربہ کے سر ہے

چند ممتاز اسرائیلی اور فلسطینی رہنماؤں نے مشرق وسطیٰ میں قیام امن کا ایک متبادل غیر سرکاری منصوبہ تیار کیا ہے جو سوئٹزر لینذ کے شہر جنیوا میں پیش کیا گیا۔

منصوبہ مرتب کرنے والوں کا خیال ہے کہ اس کی مدد سے امن کے ڈگمگاتے عمل کو تقویت دی جاسکے گی۔

منصوبے میں فلسطینی ریاست کے قیام، تمام یہودی بستیوں کے خاتمے اور اسرائیلی حکومت کے اس حق کی تجاویز ہیں کہ کتنے فلسطینی مہاجروں کو وہ واپس لینے کے لۓ تیار ہے۔

بائیں بازو کی ممتاز اسرائیلی اور فلسطینی شخصیتوں نے سمجھوتے کا یہ مسودہ مرتب کیا ہے جو امریکی نقشۂ راہ سے زیادہ آگے جاتا ہے۔

اس میں یروشلم پر مشترکہ حاکمیت کی تجویز ہے اور فلسطینی مہاجروں کے اس حق کو ختم کرنے کے لۓ کہا گیا کہ وہ ان گھروں میں واپس جائیں جہاں سے اسرائیل کے قیام کے وقت بے دخل کئے گئے تھے۔

منصوبے کی رونمائی کی تقریب کا اہتمام سوئس حکومت نے کیا تھا جس میں امریکہ کے سابق صدر جمی کارٹر اور پولینڈ کے سابق صدر لیخ ووینسا کی طرح کے نوبیل انعان یافتہ لوگوں نے بھی شرکت کی۔

دنیا کے نامور اشخاص مثلاً سابق صدر بل کلنٹن نے خیر سگالی کے پیغامات بھیجے۔ سینکڑوں اسرائیلی اور فلسطینی بھی جنیوا میں منصوبے کی حمایت کے لئے گئے ہوۓ ہیں۔

پچاس صفحات پر مشتمل اس مسودے کی تیاری کے ڈھائی سال کے دوران اسرائیل کے سابق وزیر انصاف یوسی بیلین اور سابق فلسطینی وزیر اطلاعات عبد ربہ خفیہ مذاکرات میں مصروف رہے۔

سابق امریکی صدر جمی کارٹر نے منصوبے پر تبصرہ کرتے ہوۓ کہا کہ یہ سمجھوتہ تنازعہ کے نازک ترین امور مثلاً سرحد کی نشان دہی، اسرائیلی آبادیوں، فلسطینی زمینوں پر زبردستی قبضے ، یروشلم اور مقدس مقامات کے مسئلے اور انتہائی تکلیف دہ یعنی فلسطینی پناہ گزینوں کی واپسی کے مسئلے کو حل کرسکتا ہے۔

منصوبے کو یورپ کی حمایت حاصل ہے اور سیکریٹری جنرل کوفی عنان نے زبانی حمایت کی ہے ۔لیکن اس کی کوئی سرکاری حیثیت نہیں ہے۔

اسرائیل نے اسے فوراً مسترد کردیا ہے اور کہا ہے یہ حکومت کی جڑیں کاٹنے کے لۓ تیار کیا گیا ہے۔

یاسر عرفات نے سرعام اس کی تائید سے انکار کردیا ہے۔ حالانکہ انہوں نے اپنے ایک اعلیٰ مشیر کو جنیوا کی تقریب میں بھیجا تھا۔