یہ صفحہ دوست کو ای میل کیجیئے		پرِنٹ کریں

شفیق رسول کے خلاف کوئی مقدمہ نہیں

اطلاعات کے مطابق گوانتانامو بے میں زیرِ حراست برطانوی باشندوں کی واپسی کا معاہدہ تقریباً طے پا گیا ہے۔

برطانوی اخبار دی آبزرور کے مطابق قطع نظر اس کے کہ وہ کسی جرم میں ملوث پائے جاتے ہیں کہ نہیں نو برطانوی باشندوں کو واپس بھیج وطن بھیج دیا جائے گا۔

انسانی حقوق سے متعلق قانون داں سٹیفورڈ سمتھ کا کہنا ہے کہ امریکہ سے ہر سطح پر مذاکرات ہو رہے ہیں۔

تاہم برطانیہ کی وزارتِ خارجہ نے اس معاملے میں کچھ بھی کہنے سے انکار کیا ہے۔

آبزرور اخبار کے مطابق امریکہ بھی چاہتا ہے کہ برطانوی باشندوں کو واپس بھیج دیا جائے تاکہ اس مسئلے پر کشیدگی ختم ہو جائے۔

سٹیفورڈ سمتھ نے کہا کہ زیادہ تر زیرِ حراست برطانوی باشندوں کو کسی نہ کسی جرم کا اقرار کرنا ہو گا جس کی سزا وہ برطانیہ میں جا کر پوری کریں گے۔

انہوں نے کہا کہ دو برطانوی باشندوں شفیق رسول اور آصف اقبال کو رہا کر دیا جائے گا۔ یہ دونوں لِپٹون لاو کے نام سے جانے جاتے ہیں۔

انہوں نے کہا کہ یہ بہت مشکل ہے کہ ان پر کوئی مقدمہ ڈالا جائے کیونکہ ان کے خلاف کچھ ہے ہی نہیں۔

امریکی صدر جارج بش کے برطانیہ کے دورے کے دوران اس بات کی امید پیدا ہو گئی تھی کہ طالبان یا القاعدہ سے تعلق کے شبہ کے الزام میں گوانتانامو بے میں قید برطانوی باشندوں سے متعلق کوئی معاہدہ جلد ہو جائے گا۔

برطانیہ کے ایک اعلیٰ جج لارڈ جسٹس سٹین نے قیدیوں کو گوانتانامو بے میں قید رکھے جانے کی شدید مذمت کی تھی اور اسے انصاف کا خون بتایا تھا۔