یہ صفحہ دوست کو ای میل کیجیئے		پرِنٹ کریں

گرفتاریاں اطالوی شہر میلان میں عمل میں آئیں

اٹلی اور جرمنی کی پولیس نے شمالی افریقہ سے تعلق رکھنے والے تین افراد کو عراق میں خودکش حملوں کے لیئے لوگوں کو بھرتی کرنے کے الزام میں تین افراد کو گرفتار کیا ہے۔

جرمنی کی پولیس نے اطالوی حکومت کو مطلوب ایک الجیریائی باشندے کو گرفتار کیا ہے۔ الجیریائی باشندے کو ’الشیخ‘ کے نام سے جانا جاتا ہے اور خیال ہے کہ اسکا تعلق اسامہ بن لادن کے القاعدہ نیٹ ورک سے ہے۔ الشیخ کا اصل نام مہجوب عبدالرزاق ہے اور اسے ہیمبرگ سے گرفتار کیا گیا۔

مراکش کے ایک شخص اور تیونس کی ایک عورت کو اٹلی میں گرفتار کیا گیا۔ جبکہ دو مشتبہ افراد ابھی بھی مفرور ہیں۔

چند گھنٹے پہلے اطالوی حکام نے ایک عورت سمیت پانچ افراد کے گرفتاری کے وارنٹ جاری کئے تھے۔ ان افراد پر عراق میں کئے گئے خودکش بم حملوں میں ملوث ہونے کا الزام ہے۔ حکام کا خیال ہے کہ ان افراد نے مبینہ طور پر شمالی افریقہ کے اسلامی شدت پسندوں کو خودکش حملوں کے لئے استعمال کیا ہے۔

مہجوب عبدالرزاق نامی اس شخص کو القاعدہ سے تعلقات کے شبہ میں اس سال کے آغاز پر جرمنی میں گرفتار کیا گیا تھا تاہم ناکافی شواہد کے باعث انہیں رہا کردیا گیا تھا۔

دریں اثناء برطانوی پولیس کا کہنا ہے کہ انہوں نے مغربی برطانیہ میں واقع ایک گھر سے اسلحہ برآمد کیاہے۔ جمعرات کے روز اسی گھر سے ایک شخص کو القاعدہ تنظیم کے ساتھ تعلقات کے الزام میں گرفتار کیا گیا تھا۔

چوبیس سالہ پاکستانی نژاد برطانوی شخص کو انسداد دہشتگردی کے قانون کے تحت گرفتار کیا گیا ہے اور وہ مرکزی لندن کے پولیس سٹیشن میں ہیں۔ پولیس کا کہنا ہے کہ ان کے گھر کی تلاشی کے دوران علاقے کے ایک سو انیس گھروں کو خالی کروایا گیا تھا۔

پولیس کا کہنا ہے کہ اس شخص کے رچرڈ ریڈ کے ساتھ بھی ممکنہ تعلقات کے بارے میں پوچھ گچھ کی جارہی ہے۔ رچرڈ ریڈ کا تعلق برطانیہ سے ہے اور ان پر اپنے جوتے میں چھپے بم کے ذریعے ایک طیارے کو تباہ کرنے کی کوشش کا جرم عائد کیا گیا ہے۔