یہ صفحہ دوست کو ای میل کیجیئے		پرِنٹ کریں

سری لنکا سے بھی حال ہی میں پاکستانیوں کو واپس بھیجا گیا ہے

قانون نافذ کرنےوالے ترک اداروں نے چونسٹھ پاکستانیوں کو ازمیر کے علاقے سے مبینہ طور پر غیر قانونی طریقے سے یورپ اسمگل کئے جانے پرگرفتار کیا ہے۔

پاکستانیوں کے ساتھ دو یونانی ملاحوں اور دو ترک باشندوں کو بھی گرفتار کیا گیا ہے۔ ترک حکام کے مطابق ان چار افراد کا تعلق مبینہ طور پر انسانوں کو اسمگل کرنے والے ایک گروہ سے ہے۔

ترک نیم فوجی دستوں کے ایک بحری یونٹ نے منگل کوایک کشتی کو روک کر اس میں سوار چونسٹھ پاکستانیوں کو گرفتار کر لیا۔ پاکستانیوں کے علاوہ اس کشتی کے عملے کو بھی حراست میں لے لیاگیا ہے۔ اس کشتی کے ذریعے پاکستانی ایک بحری جہاز پر سوار ہونے والے تھے جو سیسمی کی تفریح گاہ کے قریب سمندر میں ان کا انتظار کر رہا تھا۔

ترکی کے راستے ایشیا کے بہت سے ملکوں سے لوگوں کو یورپ اسمگل کیا جاتا ہے اور ترکی پولیس کے لیے اس طرح کی کارروائیاں ایک معمول بن گئی ہیں۔

غیر قانونی تارکین وطن عام طور پر زمینی یا سمندری راستے سے یونان سے ہوتے ہوئے یورپ میں داخل ہوتے ہیں۔

انقرہ میں پاکستان کے سفیر شیر افگن نے بی بی سی ریڈیو سے انٹرویو میں اس تازہ ترین واقعہ سے لاعملی کا اظہار کیا اور کہا کہ عام طور پر ترک حکام انہیں فوراً اطلاع کر دیتے ہیں۔

انہوں نے کہا کہ گزشتہ برس ستاسی پاکستانیوں کو گرفتار کر کے پاکستان بھیجا گیا تھا۔ انہوں کہا کہ اس سے پہلے بھی ایک سو چار پاکستانی پکڑے گئے تھے۔

انہوں نے کہا کہ گزشتہ سال پکڑے جانے والے پاکستانیوں میں زیادہ تر کا تعلق گجرات اور جہلم کے علاقوں سے تھا۔

انہوں نے کہا کے ترک حکام ان پاکستانیوں کو واپس بھیجنے میں بہت تعاون کرتے ہیں اور ان کو یہاں قید نہیں رکھا جاتا۔

شیر افگن نے کہا کہ وہ کئی بار وزارت خارجہ کے توسط سے متعلقہ اداروں سے ان لوگوں کے خلاف سخت کارروائی کرنے کی سفارش کر چکے ہیں جو معصوم لوگوں کو جھانسہ دے کر یورپ اسمگل کرنے کی کوشش کرتے ہیں۔

انہوں نے کہا کہ یہ ایجنٹ ان پاکستانیوں کو یہاں چھوڑ کر ان کے پاسپورٹ تک اپنے ساتھ لے جاتے ہیں۔ پاکستان سفارت خانہ ان کو ہنگامی پاسپورٹ جاری کر کے انہیں ایران کے راستے واپس وطن بھیجتاہے۔