یہ صفحہ دوست کو ای میل کیجیئے		پرِنٹ کریں

بھارتی ریاست تامل ناڈو میں چھ صحافیوں کی گرفتاری کے حکم کی مسلسل مذمت جاری ہے۔

اور اب اس مذمت میں حزب اختلاف کے علاوہ برسرِ اقتدار جماعت بی جے پی کے رہنما بھی شامل ہو گئے ہیں اور تامل ناڈ اسمبلی کے سپیکر کی جانب سے مبینہ طور پر ایوان کا استحقاق مجروح ہونے پر جاری کیے جانے والے حکم کو آزادئی صحافت پر حملہ قرار دیا جا رہاہے۔

صحافیوں کی گرفتاری کے احکامات ریاستی اسمبلی کے سپیکر نے ایوان میں جمعہ کو ایوان کا استحقاق مجروح کرنے کے جرم میں جاری کئے تھے۔ صحافیوں پر الزام عائد کیا گیا ہے کہ انہوں نے ایوان کی کارروائی پر اداریہ لکھ کرایوان کا استحقاق مجروح کیا ہے۔

جنوبی ریاست تامل ناڈو میں حزب اختلاف کی جماعتوں اور اخبارنویسوں کی تنظیموں نے ’دی ہندو‘ اخبار کے چھ صحافیوں اور ریاستی اسمبلی کے سابق سپیکر کی گرفتاری کے احکامات جاری کرنے کی بھی مذمت کی ہے۔

صحافیوں کوا بھی تک گرفتار نہیں کیا جا سکا۔

بی بی سی کے نامہ نگار سمپتھ کمار نے تامل ناڈو سے اطلاع دی ہے کہ صحافیوں نے ریاست کے مختلف مقامات پر احتجاج کیا اور یہ مطالبہ کیا کہ گرفتاری کے لیے جاری کئے جانے والے احکامات کو فوری طور پر واپس لیا جائے۔

حزب اختلاف کی تمام سیاسی جماعتیں پہلے ہی اسمبلی کے ان احکامات کو آزادئی صحافت کے خلاف اور قابل مذمت قرار دے چکی ہیں۔

اس سلسلے میں ایک مقامی اخبار کے مدیر کو پندرہ دن قید کی سزا بھی سنائی گئی ہے۔ ان پر الزام ہے کہ انہوں نے ’دی ہندو‘ اخبار میں چھپنے والے اس اداریہ کو دوبارہ شائع کیا تھا۔

ان چھ افراد پر اسمبلی کا استحقاق مجروح کرنے اور ریاست کی وزیر اعلیٰ کی کردار کشی کا الزام عائد کیا گیاہے۔

دی ہندو اخبار کے مدیر این رام نے کہا کہ ان کے اخبار میں کوئی قابل اعتراض چیز شائع نہیں ہوئی۔

انہوں نے کہا جن الفاظ ہر اعتراض کیا گیا ہے وہ ریاست کی وزیرِ اعلیٰ جے للیتا کی تقریر کی منظر کشی کرنے کے لیے استعمال کئے گئے تھے۔