یہ صفحہ دوست کو ای میل کیجیئے		پرِنٹ کریں

برلسکونی پہلے بحری جہازوں میں گایا کرتے تھے

اطالوی وزیرِ اعظم سلویو برلسکونی نے اپنے پیار کے گیتوں کی ایک سی ڈی ریلیز کی ہے۔

گیتوں کی یہ سی ڈی انہوں نے شادی کے نغمیں گانے والے گائیک ماریئانو اپیسیلا کے ساتھ مل کر میلان میں ریلیز کی۔

سی ڈی کا نام ’بیٹر اے سونگ‘ ہے اور اس میں چودہ گیت ہیں۔ جن میں ’مائے ہارٹ ان مائے تھروٹ‘، ’ودآؤٹ یو‘ اور ’دس فالس گڈ بائے‘ شامل ہیں۔

اپیسیلا نے کہا ہے کہ برلسکونی نے گیت واقعی دل سے لکھے ہیں۔

اگرچہ اطالوی وزیرِ اعظم اپنے دورِ جوانی میں بحری جہازوں پر گانا گانے کا کام کرتے تھے اس سی ڈی میں انہوں نے ایک بھی گیت نہیں گایا۔

گیتوں میں روایتی پیار محبت، ہجر فراق اور رقابت کی باتیں کی گئی ہیں۔

اپیسیلا کے متعلق کہا جاتا ہے کہ وہ اطالوی وزیرِ اعظم کے نجی مغنی ہیں۔ وہ پہلے نیپلیز میں کار پارک کے ایٹینڈینٹ کے طور پر کام کرتے تھے اور ساتھ ساتھ کیفے اور محفلوں میں گاتے تھے۔ ان کی ملاقات اطالوی وزیرِ اعظم سے 2001 میں ایک ہوٹل میں ہوئی تھی۔

اب وہ سال میں ایک مرتبہ برلسکونی کے لئے گاتے ہیں جب وہ چھٹیوں میں فراغت اور تنہائی کے لئے سارڈنیا کے مقام پر جاتے ہیں۔

سی ڈی کے کور پر سورج کے سامنے دو افراد کو ہاتھوں میں ہاتھ ڈالے کھڑے دکھایا گیا ہے اور کور کے اندر برلسکونی کی دستخط شدہ تصویر بھی ہے۔