یہ صفحہ دوست کو ای میل کیجیئے		پرِنٹ کریں

بروکلن پل کو تباہ کرنے کی سازش کرنے والے مجرم کو بیس سال کی قید

امریکہ میں ایک عدالت نے ایک ڈرائیور کو القاعدہ کے ارکان کی مدد کرنے اور نیویارک میں بروکلن کے پل پر حملے کی منصوبہ بندی کرنے کے الزامات پر بیس سال کی سزا سنائی ہے۔

استغاثہ کا کہنا تھا کہ ایمان فارس جن کا تعلق کشمیر سے ہے امریکی شہریت رکھتے ہیں اور ماضی قریب میں وہ افغانستان جا چکے ہیں جہاں ان کی ملاقات اسامہ بن لادن سے بھی ہوئی تھی۔

استغاثہ نے کہا کہ فارس کو القاعدہ کے رکن خالد شیخ محمد کی طرف سے یہ ہدایت دی گئی تھی کہ وہ بروکلن کے پل کے آہانی رسوں کو کاٹنے کے طریقوں پر غور کریں۔

تاہم بروکلن پل کے رسوں کو کاٹنے کے اس منصوبے پر عمل نہیں ہو سکا تھا۔

ایمان فارس کو پندرھ سال کی قید دہشت گروں کو مدد فراہم کرنے اور پانچ سال کی سزا دہشت گردی کی سازش کرنے کے جرم میں سنائی گئی۔

فارس کو انیس سو نناوے میں امریکی شہریت دی گئی تھی اور انہوں نے پہلی مئی کو عدالت میں اپنے جرم کا اعتراف کیا تھا۔ تاہم بعد میں انہوں نے بے گناہ ہونے کا دعویٰ کیا اور عدالت میں یہ بیان دیا کہ انہوں نے اعتراف جرم ایف بی آئی کو دھوکہ دینے کے لیے کیا تھا تاکہ وہ بعد میں اس پر کتاب لکھ سکیں۔

استغاثہ کے وکیل نے کہا کہ مجرم نے القاعدہ کے ارکان کو سلیپنگ بیگ، موبائیل فون اور دیگر اشیاء مہیا کی تھیں۔ انہوں نے بروکلن پل کا معائنہ بھی کیا تھا اور اس خیال کو رد کر دیا تھا کے اس کے آہنی رسوں کو کاٹا جاسکتا ہے۔