یہ صفحہ دوست کو ای میل کیجیئے		پرِنٹ کریں

سیاق و سباق سے الگ کر کے تقاریر شائع کی گئیں

جس امریکی جنرل نے دہشت گردی کے خلاف جنگ کو عیسائیت اور ابلیسیت کے درمیان معرکہ قرار دیا تھا اب اپنے اس بیان پر معذرت کا اظہار کر رہے ہیں۔

لیفٹیننٹ جنرل ولیم بوئے کن نے کہا تھا کہ راسخ العقیدہ مسسلمان محض اس لئے امریکہ کے خلاف ہیں کہ امریکہ ایک عیسائی ملک ہے۔

امریکی نشریاتی ادارے این بی سی نے جنرل بوئے کن کی تقاریر کے اقتباس نشر کئے ہیں۔ ایک تقریر میں وہ صومالیہ کا ایک واقعہ بیان کرتے ہوئے کہتے ہیں کہ وہاں ایک مسلمان سپاہی نے دعوےٰ کیا کہ ’امریکی فوجی مجھے کبھی نہیں پکڑ سکتے کیونکہ میں مسلمان ہوں اور میرا اللہ مجھے امریکیوں سے محفوظ رکھے گا۔

لیکن پھر وہ سپاہی امریکی فوجیوں کی گرفت میں آ گیا۔ اور جنرل بوئے کن نے اپنی تقریر میں اس کا ذکر کرتے ہوئے کہا’میرا خدا اسکے خدا سے بڑا تھا۔ میرا خدا اصلی تھا جبکہ اس کا خدا محض واہمہ تھا‘۔

بوئے کن ایک اچھا فوجی جنرل ہے

جب امریکی وزیرِ دفاع ڈونلڈ رمزفیلڈ کی توجہ اس طرف مبذول کروائی گئی تو انہوں نہ اپنے جنرل کے دفاع میں کہا کہ وہ ایک بہت اچھا فوجی افسر ہے اور ماضی میں امریکہ کے لئے شاندار کارنامے سر انجام دے چکا ہے۔

محکمہ دفاع کے اعلیٰ افسران کا کہنا ہے کہ جنرل بوئے کن نے یہ بیان دے کر کسی فوجی اصول کی خلاف ورزی نہیں کی۔

قبل ازیں ایک تقریر میں جنرل بوئے کن نے کہا تھا کہ صدر بش کا کرسی صدارت پر بیٹھنا منشائے ایزدی ہے کیونکہ انہیں ووٹوں کی اکثریت تو حاصل نہیں ہوئی تھی اس لئے خدا نے انہیں کرسی صدارت پر بیٹھا دیا۔

جنرل بوئے کن نے مختلف حلقوں سے اٹھنے والے اعتراضات کے جواب میں کہا ہے کہ ان کے بیانات کو سیاق و سباق سے الگ تھلگ کر کے پیش کیا جا رہا ہے۔