یہ صفحہ دوست کو ای میل کیجیئے		پرِنٹ کریں

سعودی خواتین سرِ عام مردوں سے کم ہی ملتی ہیں

سعودی عرب کے دارالحکومت ریاض میں حقوق انسانی کانفرنس کے آخری دن سعودی خواتین نے بہتر سلوک کا مطالبہ کیا ہے۔

یہ سعودی عرب میں اپنی نوعیت کی پہلی کانفرنس تھی لیکن خواتین نے محسوس کیا کہ ان کے معاملات پر صرف نظریاتی طور پر غور کیا گیا، ٹھوس بحث نہیں ہوئی۔

بی بی سی کے نامہ نگار کا کہنا ہے یہ دو روزہ کانفرنس پہلا چھوٹا سا قدم ہے جو حقوق انسانی کی اہمیت کو تسلیم کرنے اور بیرونی دنیا میں حقوق انسانی کے کارکنوں سے سلسلۂ کلام شروع کرنے کی جانب ہے۔

اس سے قبل منگل کے روز ریاض میں سیاسی اصلاحات کے حق میں ہونے والا ایک مظاہرہ منتشر کر دیا گیا تھا۔

اطلاعات کے مطابق مظاہرین کو منتشر کرنے کے لئے پولیس نےہوا میں گولیاں چلائیں۔

سعودی عرب میں حقوقِ انسانی کا ریکارڈ بہت خراب ہے

مظاہرہ اس عمارت کے نزدیک منعقد کیا گیا تھا جہاں سعودی عرب میں حقوق انسانی کے بارے میں کانفرنس ہو رہی تھی۔

اگرچہ یہ واضح نہیں ہے کہ اس مظاہرے کا مقصد کیا تھا تاہم اس سے قبل برطانیہ میں قائم سعودی حزب اختلاف کی ایک تنظیم نے اعلان کیا تھا کہ وہ حکومت کے مخالفین کی حراست کے خلاف دھرنا دے گی۔

سعودی عرب میں کسی بھی قسم کے مظاہرے پر پابندی ہے۔

حقوق انسانی کی کانفرنس کا افتتاح پیر کے روز کیا گیا تھا۔ اس موقع پر حکومت نے اعلان کیا تھا کہ وہ پہلی بار ملک میں بلدیاتی انتخابات کروائے گی۔