یہ صفحہ دوست کو ای میل کیجیئے		پرِنٹ کریں

گزشتہ پچیس سال میں یہ ایرانی خواتین پولیس فورس کا پہلا دستہ ہے

ایران میں سن انیس سو اناسی کے اسلامی انقلاب کے بعد پہلی مرتبہ خواتین پولیس اہلکاروں کو دوبارہ تہران شہر میں ڈیوٹی پر تعینات کیا جا رہا ہے۔

ہفتہ کے روز دو سو سے زائد خواتین پولیس اہلکاروں کے ایک دستے کی تربیت کے مکمل ہونے پر ایک تقریب منعقد ہوئی جس میں ایران کے صدر محمد خاتمی نے بھی شرکت کی۔

تقریب میں ایران کی خواتین پولیس اہکاروں نے شرعی قواعد کے مطابق چار کا پردہ کیا ہوا تھا، مگر امکان ہے کہ وہ اپنے فرائض کی ادائیگی کے دوران ایک ڈھیلا کوٹ اور پائجامہ پہن سکیں گی۔

ان میں سے کچھ خواتین پولیس اہلکاروں نے بندوقیں اٹھا رکھی تھیں جبکہ کئی کے ہاتھوں میں روایتی تلواریں تھیں۔

تہران میں بی بی سی نامہ نگار کا کہنا ہے کہ پولیس میں خواتین کی بھرتی کی وجہ حکومت نے یہ بتائی ہے کہ خواتین اب زیادہ جرائم کا ارتکاب کر رہی ہیں۔

تقریب کے موقع پر چوبیس سالہ سوزن جیجود نیجاد نے کہا کہ یہ اس کی زندگی کا بہترین دن ہے۔

’آج میں بہت خوش ہوں کیونکہ تین سال بعد میرے تربیت مکمل ہوئی ہے اور اب مجھے بندوق چلانے اور خواتین پولیس فورس سے متعلقہ باقی تمام امور میں مہارت حاصل ہو چکی ہے۔‘

ہفتہ کے روز تربیت مکمل کرنے والی خواتین سن انیس سو ننانوے سے تہران میں واقع کوٹار کمپلیکس میں تربیت حاصل کر رہی تھیں۔

ان خواتین کی عمریں سترہ سے پچیس سال کے درمیان ہیں اور انہوں نے اپنی تربیت کے دوران جوڈو، تلوارچلانے،، بندوق چلانے اور بارودی سرنگیں بجھانے سمیت کئی فوجی کورس مکمل کئے ہیں۔

اسلامی انقلاب کے بعد سے خواتین پولیس اہلکار زیادہ تر انتظامی شعبوں میں کام کرتی آ رہی ہیں۔