یہ صفحہ دوست کو ای میل کیجیئے		پرِنٹ کریں

امریکی فوج کو لگاتار چھاپہ مار کاررائیوں کا سامنا ہے

عراق میں امریکی فوج پر کیے جانے والے کئی حملوں میں متعدد امریکی فوجی زخمی ہوگئے ہیں۔ ایک سپاہی اس وقت زخمی ہوگیا جب فلوجہ کے مغرب میں واقع ہبانیہ کے قصبہ میں پڑاؤ پذیر امریکی کاروان پر عراقی چھاپہ ماروں نے فائرنگ شروع کر دی۔

امریکی فوج کے ترجمان نے بتایا ہے کہ اس حملے میں دو امریکی فوجی گاڑیاں بھی تباہ ہوگئیں۔ان گاڑیوں پر راکٹ سے چلنے والے گرینیڈ پھینکے گئے۔

ترجمان نے کہا کہ اس حملے کے جواب میں امریکی دستے نے قرب و جوار کے مکانوں پر فائرنگ کی تاہم وہ یہ بتانے سے قاصر ہیں کہ اس کے نتیجہ میں کتنا نقصان ہوا۔

نامہ نگاروں کا کہنا ہے کہ دارالحکومت بغداد سے ستّر کلومیٹر دور واقع فلوجہ میں اپریل میں سولہ مظاہرین کی ہلاکت کے بعد سے امریکیوں کو شدید مزاحمت کا سامنا ہے۔

امریکی فوج کے ترجمان نے بتایا کہ موصل میں ہونے والے ایک اور حملے میں تین فوجی زخمی ہوئے ہیں۔