جھارکھنڈ میں ’ڈائن‘ ہونے کے شبہے میں پانچ خواتین قتل

بھارت کی ریاست جھارکھنڈ میں حکام کے مطابق ایک گاؤں میں مقامی افراد نے ’ڈائن‘ قرار دے کر پانچ خواتین کو قتل کر دیا ہے۔

پولیس کے مطابق یہ واقعہ دارالحکومت رانچی سے37 کلومیٹر دور واقع گاؤں کجیا میں پیش آیا ہے۔

حکام کا کہنا ہے کہ دیہاتیوں نے جمعے کو رات گئے ان خواتین کو ان کے گھروں سے نکالا اور قتل کر دیا۔

ہلاک کی جانے والی پانچوں خواتین کا تعلق گاؤں کے مختلف خاندانوں سے تھا۔

واقعے کی اطلاع ملتے ہی پولیس نے کارروائی کی ہے اور اس سلسلے میں تقریباً دو درجن افراد کو حراست میں لیا گیا ہے۔

رانچی کے ایس پی (رورل) نے بی بی سی ہندی کو بتایا کہ دیہاتیوں کے ایک گروپ نے مل کر ان خواتین کے قتل کا فیصلہ کیا تھا۔

پولیس افسر کے مطابق انھیں شک تھا کہ یہ خواتین ڈائن ہیں اور ان کی وجہ سے گاؤں میں امن نہیں رہتا۔

ہلاک کی گئی ایک خاتون کے لواحقین نے بتایا کہ دیہاتیوں نے دروازہ کھلوایا اور جب تک وہ کچھ سمجھ پاتے، ان لوگوں نے ایک ایک کر کے خواتین کو باہر نکال لیا جس کے بعد انھیں تیز دھار ہتھیاروں سے مار دیا گیا۔

لواحقین کے مطابق اس واقعے کے بعد قاتل وہیں موجود رہے اور لاشیں دینے سے بھی انکار کر دیا۔

موقع پر پہنچنے والی پولیس بھی کافی دیر بعد ہی لاشوں کو پوسٹ مارٹم کے لیے لے جا پائی۔

خیال رہے کہ جھارکھنڈ میں ماضی میں بھی ڈائن ہونے کا الزام لگا کر خواتین کے قتل کے واقعات پیش آتے رہے ہیں۔

پولیس حکام کے مطابق ریاست بننے کے بعد سے اب تک اس طرح کے واقعات میں 1200 خواتین کو ہلاک کیا جا چکا ہے۔