قطر میں طالبان کے ساتھ امن مذاکرات کا امکان
،تصویر کا ذریعہAFP
افغانستان میں قیام امن کی تلاش میں ہفتے کو ایک افغان وفد قطر روانہ ہو رہا ہے جہاں وہ طالبان کے نمائندوں کے ساتھ حکام کے مطابق ’کھلی بات چیت‘ کرے گا۔
یہ ملاقات جو ایک علاقائی کانفرنس کا حصہ ہے افغانستان میں جاری جنگ کو ختم کرنے کے لیے باضابط مذاکرات کی طرف پہلا قدم ثابت ہو سکتی ہے لیکن ابھی تک یہ واضح نہیں ہے کہ طالبان کے رہنما ملا عمر کو اس کی منظوری حاصل ہے کہ نہیں کیونکہ گزشتہ کئی برس سے وہ منظر عام پر نہیں آئے۔
پاکستان کے فوجی سربراہ راحیل شریف نے افغان صدر اشرف غنی کو فروری میں بتایا تھا کہ طالبان کی اعلیٰ قیادت کابل کی حکومت کے ساتھ بات چیت کے لیے تیار ہے لیکن ابھی تک اس ضمن میں پیش رفت کا کوئی اشارہ نہیں ملتا۔
برطانوی خبررساں ادراے روائٹرز کو افغان امن کونسل کے نائب سربراہ عطا اللہ الدین نے بتایا ہے کہ اتوار اور پیر کو ہونے والی بات چیت میں حصہ لینے والا افغان وفد بیس ارکان پر مشتمل ہے۔
،تصویر کا ذریعہAFP
انھوں نے کہا کہ ’کھلی بات چیت افغانستان میں امن قائم کرنے کی بنیاد پر ہو گی اور اس میں افغانستان، پاکستان، طالبان اور کچھ اور اداروں کے نمائندے شامل ہوں گے۔‘
ماضی میں افغانستان میں مصالحت کرانے کے لیے کی جانے والی کوششیں کا کوئی نتیجہ نہیں نکلا ہے۔ اس طرح کی ایک کوشش سنہ 2013 میں بھی کی گئی تھی اور اس کے تحت امریکہ کے کہنے پر قطر میں طالبان کا دفتر بھی قائم کیا گیا تھا۔
طالبان نے حالیہ دنوں میں بات چیت سے زیادہ لڑائی کی طرف اپنا جھکاؤ ظاہر کیا ہے۔ گزشتہ ہفتے طالبان جنگجو قندوز کے بیرونی اظلاع میں داخل ہو گئے تھے۔
طالبان کے ترجمان ذبیح اللہ مجاہد نے تصدیق کی ہے کہ قطر میں ہونے والی کانفرنس میں طالبان کا ایک آٹھ رکنی وفد شرکت کرے گا۔
End of سب سے زیادہ پڑھی جانے والی
اس کانفرنس کا اہتمام مذاکرات کے ذریعے تنازعات کے حل کو فروغ دینے والی بین الاقوامی تنظیم پگواش کونسل نے کیا ہے۔ پگواش کونسل کو امن کا نوبل انعام بھی مل چکا ہے۔
طالبان کے ترجمان نے کہا کہ اس کانفرنس میں شرکت کرنے کا ہرگز مطلب یہ نہیں ہے کہ کوئی امن بات چیت یا مذاکرات ہو رہے ہیں۔
روائٹرز نے قطر میں موجود طالبان کے ایک نمائندے کے حوالے سے کہا ہے کہ طالبان اور افغان حکومتی وفد کے درمیان براہ راست بات چیت ہو گی۔
.
