’لَوجہاد‘ پر ہندو قوم پرستوں کی ناراضگی

بھارت کے دارالحکومت دہلی سے ملحق مغربی اتر پردیش میں ہندو قوم پرستوں نے ’لَو جہاد‘ کے خلاف محاذ کھولا ہوا ہے۔ ویسے تو یہ محبت کی جنگ ہے لیکن محبت کے نام پر جام شہادت پینے والوں کو جواب نفرت سے دیا جا رہا ہے۔

لیکن محبت اور جنگ میں سب جائز ہے۔

قوم پرستوں کا الزام یہ ہے کہ مسلمان نوجوان ہندو لڑکیوں کو ایک وسیع تر سازش کے تحت اپنی محبت کے جال میں پھنسا رہے ہیں اور اس غیر معمولی حکمت عملی کو انھوں نے ’لَو جہاد‘ کا نام دیا ہے۔

جوابی کارروائی شروع ہوگئی ہے اور مغربی اتر پردیش کے کئی علاقوں میں تنظیم کے کارکن گھر گھر جاکر ہندو لڑکیوں کے ہاتھوں پر راکھی باندھ رہے ہیں، انھیں یہ سمجھانے کے لیے کہ وہ مسلمان نوجوانوں سے ہوشیار رہیں اور ان کی محبت میں گرفتار نہ ہوں۔

گذشتہ برس جب مظفر نگر میں فسادات ہوئے تھے تب بھی یہ تاثر دیا گیا تھا کہ ’لَو جہادی‘ چاروں طرف پھیل گئے ہیں۔ پھر گذشتہ ہفتے میرٹھ میں ایک ہندو لڑکی نے ایک مدرسے سے وابستہ کچھ لوگوں پر اجتماعی ریپ کا الزام لگایا تو قوم پرستوں نے کھل کر اعلان جنگ کر دیا۔

ابھی یہ واضح نہیں ہے کہ ان نوجوانوں کو محبت کی تربیت کون دے رہا ہے اور جب ہندو لڑکے مسلمان لڑکیوں سے شادی کرتے ہیں تو کیا وہ ’ریورس لَو جہاد‘ ہوتا ہے، اور انھیں محبت کر کے انتقام لینے کی تربیت کون دے رہا ہے؟

بہرحال، تاریخ پر اگر نظر ڈالیں تو اکبر اعظم سمیت کئی مغل بادشاہوں نے ہندو راجپوت شہزادیوں سے شادیاں کیں، نائب صدر جمہوریہ ایم ہدایت اللہ کی اہلیہ کا نام پشپا تھا، بالی وڈ میں ہندو لڑکیوں سے شادی کرنےوالوں میں فیروز خان تھے، پھر نصیر الدین شاہ ہیں، عامر خان ہیں، شاہ رخ ہیں، سیف علی خان ہیں (ایک مرتبہ نہیں دو مرتبہ)، ان کے والد نواب منصور علی خان پٹودی تھے، اظہرالدین ہیں، استاد امجد علی خان ہیں ۔۔۔

یہ فہرست بہت لمبی ہے، قوم پرست ہی بتائیں گے ان لوگوں کے نام ’لَو جہادیوں‘ کی فہرست میں لکھے جائیں گے یا نہیں۔ اور کیا اعتراض کرنے والے فیصلہ کرنے سے پہلے ان لڑکیوں سے بھی ان کی رائے پوچھیں گے یا نہیں؟

خاموشی سے دلوں کو جوڑ رہے ہیں مودی

نریندر مودی کے انداز سیاست پر ا عتراض کرنے والے کہتے ہیں کہ وہ لوگوں کو تقسیم کرتے ہیں، لیکن بہار پر نظر ڈالیں تو اس کا الٹ نظر آتا ہے۔

وہاں نریندر مودی کی بدولت دس ایسے سیاسی حریف گلے شکوے بھلا کر بغل گیر ہو رہے ہیں جنھیں ایک دوسرے کی شکل دیکھنا بھی گوارا نہیں تھا۔

20 سال بعد بہار کے وزرائے اعلیٰ سابق وزیراعلیٰ لالوپرساد یادو اور نتیش کمار پھر ایک سٹیج پر نظر آرہے ہیں، اور ان کا نصب العین یہ ہے کہ بہار میں کسی بھی قیمت پر نریندر مودی کو روکا جائے۔ اس کام میں کانگریس بھی ان کے ساتھ ہے۔ اب بھلائی کا زمانہ نہیں رہا۔

تینوں کو مودی کا شکر گزار ہونا چاہیے، لیکن ’لَو جہاد‘ کے اس ماحول میں اب پرانے فیشن کے پیار محبت اور نیک نیتی کی پروا بھلا کون کرتا ہے۔

عدلیہ میں بدعنوانی

سپریم کورٹ کے سابق جج جسٹس مارکنڈے کاٹجو نے پھر اعلیٰ عدلیہ میں بدعنوانی کا الزام لگایا ہے۔ اس مرتبہ نشانے پر الہ آباد ہائی کورٹ کے بعض سابق جج ہیں۔ جب جسٹس کاٹجو سپریم کورٹ کے جج تھے تب بھی انھوں نے الٰہ آباد ہائی کورٹ کے بارے میں انتہائی سخت زبان استعمال کی تھی۔

جسٹس کاٹجو کا کہنا ہے کہ پانچ جج تو اتنے بدنام تھے کہ وہ چاہتے تھے کہ انھیں عدالت کے احاطے میں داخل ہی نہ ہونے دیا جائے۔ ان سے کہا جائے کہ کورٹ آنے کی ضرورت نہیں ہے آپ کی تنخواہ گھر پہنچتی رہے گی۔ لیکن سپریم کورٹ کے اس وقت کے چیف جسٹس اس کے لیے تیار نہیں ہوئے کیونکہ انھیں عدلیہ کی بدنامی کی فکر تھی۔

لیکن جسٹس کاٹجو نے ایک اور حیرت انگیز دعویٰ کیا ہے۔ انھوں نے نام ظاہر کیے بغیر لکھا ہے کہ ایک جج کو الٰہ آباد ٹرانسفر کیا گیا کیونکہ وہ بہت بدعنوان تھے۔

اب یہ نتیجہ آپ خود اخذ کیجیے کہ یہ کیسی سزا ہے؟ ان صاحب کو سبق سیکھنے کے لیے الہ آباد بھیجا گیا تھا یا سکھانے کے لیے؟