بھارت: انتخابات میں پولنگ کا تیسرا دن، 91 نشستوں کے لیے ووٹنگ جاری
،تصویر کا ذریعہReuters
بھارت میں پہلے دو مرحلے کی پولنگ کے بعد تیسرے مرحلے کے لیے 14 ریاستوں اور مرکز کے زیر انتظام علاقوں کی 91 لوک سبھا نشستوں کے لیے جمعرات کو ووٹ ڈالے جا رہے ہیں۔
اس میں دارالحکومت دہلی کی سات نشتوں کے علاوہ ہریانہ، اتر پردیش، مہاراشٹر اور اوڑیسا کی 10، مدھیہ پردیش کی نو، بہار کی چھ، جھارکھنڈ کی چار اور کیرالہ کے تمام 20 سیٹوں کے لیے ووٹ ڈالے جائیں گے۔
اس کے علاوہ چھتیس گڑھ، جموں و کشمیر، چندی گڑھ، انڈمان و نکوبار اور لکش دیپ کی ایک ایک سیٹ کے لیے بھی پولنگ ہوگی۔
ان 91 سیٹوں پر تقریبا 11 کروڑ ووٹر کل 1418 امیدواروں کی قسمت کا فیصلہ کریں گے۔
تاہم پورے ملک کی نظریں دہلی کی سات سیٹوں کے انتخابات پر لگی ہوں گی۔ دہلی کی سات سیٹوں کے لیے تقریبا سوا کروڑ سے زائد ووٹر کل 150 امیدواروں کی ہار جیت کا فیصلہ کریں گے۔
نامور امیدوار
،تصویر کا ذریعہPTI
دہلی میں جن لوگوں کی قسمت کا فیصلہ ہونا ہے ان میں کانگریس کے مرکزی وزیر کپل سبل، کانگریس کی مرکزی وزیر کرشنا تيرتھ، سابق مرکزی وزیر اجے ماکن، دہلی پردیش بی جے پی کے سینیئر لیڈر ہرش وردھن، دہلی پردیش کانگریس کے سابق صدر جے پی اگروال، دہلی کی سابق وزیر اعلی شیلا دکشت کے بیٹے سندیپ دیکشت جیسے معروف چہرے شامل ہیں۔
بی جے پی کی ٹکٹ پر پارٹی کے ترجمان مینا کشی لیكھی اور بھوجپوری فنکار منوج تیواری بھی انتخابی میدان میں ہیں۔ جبکہ عام آدمی پارٹی کی طرف سے دہلی حکومت کی سابق وزیر راکھی بڑلان، اور معروف ٹی وی صحافی اشوتوش جیسے نام شامل ہیں۔
دہلی کے علاوہ لوگوں کی نظریں مغربی اتر پردیش کی 10 سیٹوں پر بھی ہوں گی۔ اس میں فساد متاثر مظفرنگر، کیرانہ، سہارن پور، میرٹھ، بجنور، بلند شہر، علی گڑھ، پت، غازی آباد، گوتم بدھ نگر کے پارلیمانی علاقے بھی شامل ہیں۔
End of سب سے زیادہ پڑھی جانے والی
راشٹریہ لوک دل کے صدر اور مرکزی وزیر اجیت سنگھ بھی پت سے انتخابی میدان میں ہیں۔
غازی آباد سے سابق فوجی سربراہ جنرل وی کے سنگھ بھی انتخابی میدان میں ہیں۔ اس کے علاوہ مغربی اتر پردیش سے فلم ستارے جیا پردا (آر ایل ڈی کے ٹکٹ پر بجنور سے)، نغمہ (کانگریس کے ٹکٹ پر میرٹھ سے) اور راج ببر (کانگریس کے ٹکٹ پر غازی اباد) سے اپنی قسمت آزما رہے ہیں۔
،تصویر کا ذریعہhoture
اس کے علاوہ مہاراشٹر کے ودربھ علاقے کے عوام بی جے پی کے سابق صدر نتن گڈکری کی قسمت کا فیصلہ بھی کرے گی۔
کیرل کے ترونتپرم سیٹ سے ششی تھرور مسلسل دوسری بار انتخاب جیتنے کے ارادے سے انتخابی میدان میں ہیں۔
چندی گڑھ میں دو اداکارہ کرن کھیر (بی جے پی) اور گل پناگ (عام آدمی پارٹی) کانگریس امیدوار اور سابق مرکزی وزیر ریل پون کمار بنسل کو مشکل چیلنج پیش کر رہی ہیں۔
نو مرحلے میں پولنگ
مدھیہ پردیش کی چھدواڑا سے مرکزی وزیر کمل ناتھ کی قسمت کا بھی فیصلہ عوام کرے گی.
اوڈشا میں لوک سبھا کی سیٹوں کے ساتھ - ساتھ اسمبلی کے انتخابات بھی ہو رہے ہیں، جس میں بیجو جنتا دل کے نوین پٹنائک کی جیت پکی مانی جا رہی ہے۔
2009 کے عام انتخابات کے دوران ان 91 سیٹوں میں سے 45 سیٹوں پر کانگریس کے امیدواروں نے کامیابی حاصل کی تھی. جبکہ بی جے پی کو محض 13 سیٹوں پر کامیابی ملی تھی. لیکن اس بار کے انتخاب سے قبل رائے عامہ کے جائزوں میں بی جے پی کی حالت بہتر بتائی جا رہی ہے.
16 ویں لوک سبھا کی تشکیل کے لئے ملک بھر میں نو مراحل میں انتخابات کرائے جا رہے ہیں. سات اپریل سے شروع ہونے والے عام انتخابات 12 مئی کو ختم ہوں گے. 16 مئی کو ووٹوں کی گنتی کی جائے گی.
