سونیا گاندھی کے پاس کتنی جائیداد ہے؟
،تصویر کا ذریعہReuters
بھارت کی برسراقتدار سیاسی جماعت کانگریس کی صدر سونیا گاندھی کے پاس 9 کروڑ 28 لاکھ روپے سے زیادہ کی جائیداد ہے لیکن ان کے نام ایک بھی کار نہیں ہے۔
اتر پردیش کے رائے بریلی انتخابی حلقے میں بدھ کو کاغذات نامزدگی داخل کرنے کے دوران سونیا گاندھی نے جو حلف نامہ پیش کیا ہے اس میں یہ معلومات فراہم کی گئی ہیں۔
کاغذات نامزدگی داخل کرتے وقت جو حلف نامہ داخل کیا گیا اس کے مطابق سونیا گاندھی کے پاس 2 کروڑ 81 لاکھ روپے کی منقولہ اور 6 کروڑ 47 لاکھ روپے کی غیر منقولہ جائیداد ہے۔
گذشتہ انتخابات کے وقت انھوں نے اپنی جائیداد کے بارے میں جو حلف نامہ دائر کیا تھا اگر اس سے حالیہ حلف نامے کا تقابل کیا جائے تو یہ بات سامنے آتی ہے کہ ان کی جائیداد میں چھ گنا اضافہ ہوا ہے۔
کانگریس ذرائع کے مطابق سونیا گاندھی کی جائیداد میں چھ گنا اضافے کی وجہ یہ ہے کہ پچھلی بار جائیداد کا اندازہ ’اسیٹ ویلیو‘ کی بنیاد پر کیا گیا تھا جبکہ اس بار یہ اندازہ ’مارکیٹ ویلیو‘ کی بنیاد پر کیا گيا ہے۔
جائیداد کی تفصیلات میں یہ بھی بتایا گیا ہے کہ سونیا گاندھی نے اپنے بیٹے راہل گاندھی کو 9 لاکھ روپے قرض کے طور پر دیا ہے۔ سنہ 2012-13 کی مدت کے لیے انکم ٹیکس ریٹرن کے طور پر انھوں نے اپنی آمدنی 14 لاکھ 21 ہزار روپے دکھائی تھی۔
،تصویر کا ذریعہAP
منقولہ جائیداد میں سونیا گاندھی کے پاس 85 ہزار روپے نقد، بینک میں 66 لاکھ روپے، ایک لاکھ 90 ہزار کے حصص اور 10 لاکھ کے بانڈز شامل ہیں۔
ان کے پاس 82 لاکھ 20 ہزار کے ميوچل فنڈ، 42 لاکھ 49 ہزار روپے کا پي پی ایف، 2 لاکھ 86 ہزار کی نیشنل بچت سکیم اور 62 لاکھ روپے کے زیورات موجود ہیں۔
End of سب سے زیادہ پڑھی جانے والی
حلف نامے کے مطابق اٹلی میں ڈیراماڈي گاؤں میں چار کروڑ 86 لاکھ کی قیمت کی زمین اور سلطان پور گاؤں میں ایک کروڑ 40 لاکھ کی زمین کے علاوہ ان کے پاس 19 لاکھ 90 ہزار روپے کی آبائی جائیداد بھی ہے۔
سنہ 2009 میں سونیا گاندھی نے اپنی جائیداد کی تفصیل میں ایک کروڑ 37 لاکھ سے زیادہ قیمت کی جائیداد کا اعلان کیا تھا۔
