آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
انڈیا میں غیر ملکی کاروبار: فورڈ کا بھی انڈیا سے رخصت ہونے کا اعلان
کاریں بنانے والی امریکی کمپنی فورڈ نے اعلان کیا ہے کہ وہ انڈیا میں کار بنانے کے دونوں پلانٹ بند کر رہا ہے۔
کمپنی کے ایک اعلان کے مطابق وہ سنہ 2022 کی دوسری سہہ ماہی تک ریاست گجرات اور تمل ناڈو میں اپنے کارخانے بند کر دے گا۔ البتہ کمپنی نے اعلان کیا کہ کار انجن بنانے کا کارخانہ بدستور انڈیا میں رہے گا جہاں سے تیار کیے گئے انجن بیرون ملک برآمد کیے جائیں گے۔
فورڈ تیسری ایسی امریکی کمپنی ہے جس نے حالیہ برسوں میں انڈیا میں اپنا کاروبار ختم کرنے کا اعلان کیا ہے۔
اس سے پہلے 2017 جنرل موٹرز نے بھی انڈین مارکیٹ کے لیے کاریں بنانا ختم کر دیا تھا۔
موٹر سائیکل بنانے والی کمپنی ہارلے ڈیوڈسن پہلے ہی انڈیا میں اپنے آپریشن میں کمی کر چکی ہے۔
End of سب سے زیادہ پڑھی جانے والی
امریکی کمپنی کی طرف سے انڈیا میں کاروبار ختم کرنے کا اعلان وزیر اعظم نریندر مودی کے لیے ایک جھٹکا ہے جو بیرونی کمپنیوں کو انڈیا میں سرمایہ کاری پر راغب کرنے کی کوشش کر رہے ہیں۔
فورڈ کمپنی نے ایک بیان میں کہا ہے کہ اسے انڈیا میں اپنے کاروبار کے دوران دو ارب ڈالر کا نقصان اٹھانا پڑا ہے۔ حالیہ برسوں میں انڈیا میں نئی کاروں کی مانگ میں کمی واقع ہوئی ہے۔
فورڈ جس نے انڈین مارکیٹ میں پانچ مختلف ماڈل متعارف کرائے تھے، اعلان کیا ہے کہ وہ موجودہ گاہکوں کو سہولیات فراہم کرتے رہیں گے۔
فورڈ نے اعلان کیا ہے کہ وہ مستقبل میں الیکٹریکل ایس یو وی متعارف کرائے گا۔ البتہ یہ واضح نہیں ہے کہ کمپنی الیکٹریکل گاڑیاں انڈیا میں تیار کرے گی یا نہیں۔
فورڈ کمپنی گذشتہ پچیس سالوں سے انڈیا میں کاریں تیار کر رہی ہے لیکن اسے مقابلے میں مشکلات کا سامنا رہا ہے۔
اطلاعات کے مطابق فورڈ کمپنی کا انڈیا کی کار کی صنعت میں حصہ صرف دو فیصد ہے اور وہ انڈیا میں بڑی کار کمپنیوں میں کی فہرست میں نوویں نمبر پر ہے۔ .
