آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
انڈین یوٹیوبر پالتو کتے کو غباروں سے باندھ کر ’اڑانے‘ پر گرفتار
انڈین پولیس نے ایک یوٹیوبر کو اپنے پالتو کتے کو گیس بھرے غباروں کے ساتھ باندھ کر 'اڑانے کی کوشش' کرنے پر گرفتار کر لیا ہے۔
بتیس سالہ گورو شرما کی بنائی گئی ایک ویڈیو میں دیکھا جا سکتا ہے کہ انھوں نے اپنے پالتو کتے کو گیس بھرے غباروں سے باندھا اور ہوا میں اڑنے کے لیے چھوڑ دیا۔
اس کے چند ہی لمحوں بعد کسی نے عمارت کی دوسری منزل پر بالکونی سے کتے کو پکڑ لیا۔ یوٹیوبر شرما کا کہنا تھا کہ انھوں نے اس ویڈیو کو فلمانے کے لیے تمام حفاظتی اقدامات اپنائے تھے لیکن سوشل میڈیا پر تنقید کے بعد انھوں نے اپنی ویڈیو کو ڈیلیٹ کر دیا ہے۔
انھوں نے یہ ویڈیو اپنے یوٹیوب چینل پر پوسٹ کی تھی۔ ان کے یوٹیوب چینل کے 40 لاکھ سے زیادہ سبسکرائبرز ہیں۔
یہ بھی پڑھیے
End of سب سے زیادہ پڑھی جانے والی
پولیس کا کہنا ہے کہ انھوں نے جانوروں کی فلاح کے لیے کام کرنے والے ایک ادارے پیپل فار اینمل (پی ایف اے) کی جانب سے گورو شرما کے خلاف شکایت ملنے کے بعد انھیں گرفتار کیا ہے۔
ویڈیو میں دیکھا جا سکتا ہے کہ شرما ایک گاڑی کے اوپر کھڑے ہیں اور ان کا پالتو کتا بھی گیس سے بھرے غباروں کے ساتھ بندھا نظر آ رہا ہے۔ ایک موقع پر وہ غباروں کو ہوا میں چھوڑ دیتے ہیں اور ان کا کتا ہوا میں اڑنے لگتا ہے۔
اسی اثنا میں جب وہ عمارت کی دوسری منزل تک پہنچتا ہے تو کوئی بالکونی میں آ کر کتے کو تھام لیتا ہے۔ اس موقع پر ویڈیو میں خوشی کے اظہار کی آواز سنی جاسکتی ہے اور ایسا لگتا ہے کہ وہ شخص کتے کو بچا رہا ہے۔
بعدازاں یوٹیوبر شرما نے ایک ویڈیو اپ لوڈ کی جس میں انھوں نے اس پر معافی مانگی اور وضاحت کی کہ انھوں نے اپنے 'ڈالر' نامی پالتو کتے کے ساتھ یہ فلم بناتے ہوئے 'تمام حفاظتی اقدامات' اٹھائے تھے۔
اس ویڈیو میں ان کا کہنا تھا کہ وہ دوسرے یوٹیوبرز سے متاثر ہوئے تھے جو اپنی ویڈیوز میں ایسے ہی سٹنٹ کرتے ہیں۔ انھوں نے اپنے شائقین سے کہا کہ وہ ان کی ویڈیو میں کیے جانے والے اقدامات سے متاثر نہ ہوں۔
ان کا مزید کہنا تھا کہ وہ جانوروں سے محبت کرتے ہیں اور اپنے کتے ڈالر کا ایک بچے کی طرح خیال رکھتے ہیں۔
