بنگلہ دیش کی تاریخ کو کیمرے میں محفوظ کرنے والے شاہد العالم

بنگلہ دیش میں رواں ماہ نوجوانوں کی جانب سے مظاہروں کے تناظر میں مشہور فوٹوگرافر اور انسانی حقوق کے کارکن شاہدالعالم کو گرفتار کر لیا گیا ہے۔

تیز رفتار بس کی زد میں آ کر دو بچوں کی موت کے بعد ہزاروں کی تعداد میں طلبہ سڑکوں پر نکل آئے اور شاہد العالم نے ان مظاہروں کو کیمرے میں محفوظ کیا۔

عالم کے ساتھی رہنما احمد نے لکھا ہے کہ عالم ملک کے نوجوانوں سے متاثر تھے جو ریاستی تشدد کے سامنے جھکے نہیں۔

عالم نے بین الاقوامی میڈیا اور فیس بک پر حکومت کی جانب سے غلط طریقے سے نوجوانوں کے مظاہروں کو کنٹرول کرنے پر تنقید کی تھی۔ حکومت نے الزام لگایا ہے کہ انھوں نے غلط معلومات پھیلائیں۔ ان پر متنازع انٹرنیٹ قانون کے تحت کارروائی کی جا رہی ہے۔

انسانی حقوق پر نظر رکھنے والی تنظیموں کا کہنا ہے کہ مظاہروں کے بعد حکومت نے درجنوں ناقدین کو حراست میں لیا۔

63 سالہ عالم کا کہنا ہے کہ ان کو حراست میں تشدد کا نشانہ بنایا گیا ہے۔ بین الاقوامی انسانی حقوق کی تنظیموں نے عالمی آرٹسٹ اور لکھاریوں کے ساتھ عالم کی رہائی کا مطالبہ کیا ہے۔

کئی دہائیوں سے عالم نے بنگلہ دیش میں ہونے والے واقعات کیمرے میں محفوظ کیے ہیں اور ان کی تصاویر مشہور اخباروں اور رسالوں میں شائع ہوئی ہیں۔

ڈرک پکچر ایجنسی کے بانی ہونے کے ناطے عالم نے کئی فوٹوگرافروں کو تربیت دی ہے۔

جمہوریت کے لیے جدوجہد

80 کے آخر میں بنگلہ دیش میں ہلچل کا آغاز ہوا۔ ملک میں بڑے پیمانے پر مظاہرے، ہڑتالیں اور بدامنی پھیلی جس کے باعث جنرل حسین محمد ارشاد کی حکومت ختم ہوئی۔

شاہدالعالم نے ان تبدیلیوں کو تصاویر کے ذریعے دکھایا۔

جنرل ارشاد کے حکومت کے خلاف سب سے مشہور کارکن نور حسین تھے۔ ان کو پولیس نے سنہ 1987 میں قتل کر دیا اور ان کو جمہوریت کے لیے جدوجہد کے ’شہید‘ کے طور پر یاد رکھا جاتا ہے۔

نومبر 1987 میں نور حسین کی موت کے بعد اور 72 گھنٹے کی ہڑتال سے پہلے حکومت نے ایمرجنسی نافذ کر دی۔

لیکن سنہ 1990 میں حزب اختلاف متحد ہوئی اور جنرل ارشاد کی حکومت ختم کرنے کے لیے جدوجہد کا آغاز کیا۔

چار دسمبر 1990 کی رات کو صدر ارشاد مستعفی ہونے پر آمادہ ہو گئے۔ نیو یارک ٹائمز کی شہ سرخی تھی ’انقلاب سے بنگلہ دیش میں امید کی کرن‘۔

عالم نے ڈھاکہ کی سڑکوں پر جشن کے مناظر کی تصاویر بنائیں۔

سنہ 1991 میں ملک میں پہلا آزاد الیکشن ہوا اور لاکھوں افراد نے ووٹ ڈالے۔ ملک کی تاریخ میں اہم موڑ کو محفوظ کرنے کے لیے عالم موجود تھے۔

’ماورائے آئین‘ ہلاکتیں

عالم نے نہ صرف ملک کی شورش زدہ سیاست ہی کو محفوظ نہیں کیا بلکہ انھوں نے جرائم کے خلاف ریپڈ ایکشن بٹالین کی متنازع کارروائیوں پر بھی نظر رکھی۔

بنگلہ دیش میں انسانی حقوق کی تنظیموں اور بین الاقوامی تنظیم ایمنسٹی انٹرنیشنل اور ہیومن رائٹس واچ نے بھی ماورائے آئین ہلاکتوں کی مذمت کی اور تحقیقات کا مطالبہ کیا۔

شاہد العالم نے جب ان ماورائے آئین ہلاکتوں پر اپنی تصاویر کی نمائش کی جس کا نام ’کراس فائر‘ رکھا تو پولیس نے گیلری بند کرا دی۔ اس کارروائی کے بعد مظاہرے ہوئے۔

تصاویر میں ہلاکتوں پر تو زیادہ توجہ نہیں دی گئی لیکن ان ہلاکتوں کے سیاق و سباق پر توجہ دی گئی جن میں ہلاکتیں ہوئیں۔

سیلاب اور سمندری طوفان

شاہد العالم نے قدرتی آفات کو بھی کیمرے میں محفوظ کیا۔ سیلاب ہوں یا سمندری طوفان جن سے شہروں اور قصبوں میں تباہی ہوئی۔

سنہ 1988 میں بنگلہ دیش کی تاریخ کا تباہ کن ترین سیلاب آیا جس سے ملک کا 60 فیصد علاقہ بشمول دارالحکومت ڈھاکہ کے کچھ علاقوں کے زیر آب آیا۔

تمام تصاویر کے جملہ حقوق محفوظ ہیں