چین کی معروف فنکارہ کی ’گمشدگی‘ پر مداحوں کی تشویش
،تصویر کا ذریعہGetty Images
چین کے سوشل میڈیا صارفین ملک کی سب سے معروف اداکارہ اور ماڈل فین بِنگ بِنگ کی ’گمشدگی‘ کے بارے میں سوالات کر رہے ہیں۔
فین بِنگ بِنگ دنیا میں سب سے زیادہ معاوضہ لینے والے اداکاروں میں سے ایک ہیں تاہم چین کے ذرائع ابلاغ کا کہنا ہے کہ انھیں یکم جولائی کو بچوں کے ہسپتال کا دورہ کرنے کے بعد عوام میں نہیں دیکھا گیا ہے۔
چین کے سوشل میڈیا صارفین ملک کی مشہور سینا ویبو مائیکرو بلاگ پر ان کی غیر معمولی خاموشی کو بھی نوٹ کر رہے ہیں جہاں ان کے 62 ملین سے زیادہ مداح ہیں۔
چین کی معروف اداکارہ اور ماڈل آخری بار اس بلاگ پر 23 جولائی کو فعال تھیں جب انھوں نے متعدد پوسٹس کو ’لائیک‘ کیا تھا۔
یہ بھی پڑھیے
واضح رہے کہ مئی میں چین کے معروف ٹی وی پریزینٹر سوئی ینگوان نے فین بِنگ بِنگ پر ٹیکس چوری کا الزام عائد کیا تھا تاہم ان کے سٹوڈیو نے اس کی تردید کی تھی۔ فین بِنگ بِنگ کے سٹوڈیو نے ان کی گمشدگی پر ابھی تک کوئی تبصرہ نہیں کیا ہے۔
سوشل میڈیا تشویش
،تصویر کا ذریعہSINA WEIBO
فین بِنگ بِنگ عالمی سطح پر ایک گلوکارہ اور ماڈل کے علاوہ ایکس مین فرنچائز کے حوالے سے بھی مشہور ہیں۔
وہ چین کی سب سے زیادہ بااثر سیلیبریٹی ہیں اور اپنے ویبو اکاؤنٹ پر باقاعدگی سے پوسٹ کرتی ہیں۔ ان کی جانب سے کیے جانے والے پوسٹس پر ہزاروں صارفین کی آرا آتی ہیں۔
End of سب سے زیادہ پڑھی جانے والی
اس وجہ سے انٹرنیٹ پر ان کی جانب سے غیر معمولی خاموشی کے باعث چین کے سینکڑوں ہزاروں سوشل میڈیا صارفین تشویش کا اظہار کر رہے ہیں۔
چین کے متعدد سوشل میڈیا صارفین فین بِنگ بِنگ کی جانب سے دو جون کو کی جانے والی پوسٹ کا جواب دے رہے ہیں اور انھیں کہہ رہے ہیں کہ وہ اپنے بارے میں ایک بیان جاری کریں جس میں وہ اس بات کی تصدیق کریں کہ وہ ٹھیک ہیں۔
متعدد صارفین کا کہنا ہے ’فین بِنگ بِنگ ہم آپ سے پیار کرتے ہیں‘ جبکہ دیگر کا کہنا ہے ’ہم آپ کے جواب کے منتظر ہیں۔‘
سوشل میڈیا صارفین فین بِنگ بِنگ کو حراست میں لیے جانے کے بارے میں بھی سوالات کر رہے ہیں لیکن یہ صرف افواہ ہی ہے۔ وہ اداکارہ پر ٹیکس چوری کے الزام کے حوالے سے بھی باتیں کر رہے ہیں۔
فین بینگ بینگ کے سٹوڈیو نے جون میں ان الزامات کا جواب دیتے ہوئے کہا تھا کہ انھوں نے کبھی بھی دہرے کنٹریکٹ پر دستخط نہیں کیے۔ یعنی ایک ایسا کنٹریک جس پر وہ رقم ہو جو آپ کو اس میں ملی ہو اور دوسرا کنٹریکٹ ٹیکس حکام کے لیے جس میں کم آمدنی دکھائی جاتی ہے۔
ان کے سٹوڈیو کا مزید کہنا تھا ’فین بِنگ بِنگ متعلقہ حکام سے پورا تعاون کریں گی اور ہم امید کرتے ہیں کہ تحقیقات کا نتیجہ جلد ہی عوامی شک کا جواب دینے کے لیے جاری کیا جا سکتا ہے‘۔
سینسر رپورٹ
،تصویر کا ذریعہFREE WEIBO
گذشتہ ہفتے سوشل میڈیا صارفین کے درمیان مس فین کے بارے میں اس وقت تشویش بڑھ گئی تھی جب ایک اخبار اکنامک آبزرور نے ایک متنازع مضمون شائع کیا جس میں اس بات کا اشارہ کیا گیا تھا کہ فین بِنگ بِنگ سے تفتیش کی جا رہی ہے۔
اکنامک آبزرور نے دعویٰ کیا کہ پولیس نے 26 جولائی کو فین بینگ بینگ کے سٹاف سے سوالات کیے اور یہ کہ ان کے بھائی کو کہا گیا ہے کہ وہ ان کی اجازت کے بغیر ملک چھوڑ کر نہیں جا سکتے تاہم ان کے بھائی نے اس حوالے سے کوئی تبصرہ نہیں کیا۔
سینسر شپ مانیٹرنگ ویب سائٹ فری ویبو کے مطابق اکنامک آبزرور کا آرٹیکل فوراً آف لائن کردیا گیا اور اس سے متعلق ایک سے زیادہ پوسٹس جس میں کچھ ریاست سے منسلک ذرائع ابلاغ شامل ہیں کو سینسر کیا گیا۔
میڈیا کی تشویش
چین کے میڈیا نے نوٹ کیا ہے کہ ہوائی بردارز نامی پروڈکشن کمپنی جس نے فین بِنگ بِنگ کے ساتھ معاہدہ کیا تھا اس کے گذشتہ ہفتے کے دوران سات فیصد حصص گر گئے ہیں تاہم اس کمپنی نے ایک بیان جاری کیا جس میں کہا گیا ہے کہ اس کا فین بینگ بینگ کے ساتھ کوئی تعلق نہیں ہے۔
