افغان صوبے ہلمند میں دھماکہ، 13 افراد ہلاک
،تصویر کا ذریعہGetty Images
افغانستان میں حکام کا کہنا ہے کہ جنوبی صوبے ہلمند میں ایک کار بم دھماکہ ہوا ہے جس میں کم از کم 13 افراد ہلاک اور متعدد زخمی ہوئے ہیں۔
اتوار کو ہونے والے اس بم حملے میں فوجی گاڑی کو نشانہ بنایا گیا۔
حکومتی ترجمان کا کہنا ہے کہ اس حملے کے نتیجے میں ہلاک ہونے والوں میں فوجی اہلکار اور عام شہری شامل ہیں۔
یہ حملہ ضلع نوا میں ہوا ہے جس کے بارے میں ایک ماہ قبل افغان سکیورٹی فورسز نے کہا تھا کہ وہ یہ علاقہ طالبان سے چھڑوا چکے ہیں۔
ہلمند کے گورنر کے ترجمان نے بتایا ہے کہ اتوار کو ہونے والے اس حملے میں 19 افراد زخمی بھی ہوئے ہیں۔
ہلاک اور زخمی ہونے والوں کو لشکر گاہ کے ہسپتال منتقل کیا گیا ہے۔
تاحال اس حملے کی ذمہ داری کسی کی جانب سے بھی قبول کرنے کا دعوی نہیں کیا گیا ہے۔
End of سب سے زیادہ پڑھی جانے والی
خیال رہے کہ گذشتہ دنوں افغانستان کے دارالحکومت کابل میں شیعہ مسجد میں حملے کے نتیجے میں 20 افراد ہلاک اور 40 زخمی ہو گئے تھے۔
افغان وزراتِ داخلہ نے کہا تھا کہ ایک خود کش حملہ آور نے پہلے خود کو دھماکے سے اڑایا جس کے بعد مسلح افراد مسجد کے اندر گھس گئے تھے۔
