رفعت اللہ اورکزئی بی بی سی اردو ڈاٹ کام، پشاور

	مظاہرین نے سرحد اسمبلی کے مرکزی گیٹ مظاہرہ کیا

مظاہرے میں انسانی حقوق کے لیے کام کرنی والی تنظیموں کے نمائندوں، سیاستدانوں ، این جی اوز اور خواتین کی ایک بڑی تعداد نے شرکت کی۔

مظاہرین کی قیادت عوامی نیشنل پارٹی کے مرکزی رہنما اور سابقہ ڈپٹی سپیکر سرحد اسمبلی حاجی محمد عدیل اور اے پی ایچ آر کے نمائندوں نے کی۔

مظاہرہ نشترہال پشاور سے شروع ہوا اور صوبائی اسبملی کے مرکزی گیٹ کے سامنے جاکر اختتام پذیر ہوا۔ مظاہرین نے پلے کارڈز اور بینرز اٹھا رکھے تھے جس پر ’حسبہ بل نامنظور، ملا ملٹری امریکہ اتحاد مردہ باد اور مولوویوں کا مارشل لا نامنظور نامنظور‘ کے نعرے درج تھے۔

مظاہرین نے اس موقع پر سرحد حکومت اور ایم ایم اے کے خلاف نعرہ بازی بھی کی۔

مظاہرے کے شرکاء جب سرحد اسمبلی کے مرکزی گیٹ کے سامنے پہنچے تو عوامی نیشنل پارٹی کے صوبائی صدر بشیر احمد بلور نے سرحد اسمبلی کے اجلاس سے نکل کر ان کا خیر مقدم کیا اور اس موقع پر مختصر خطاب بھی کیا۔

	’ہر کوئی آتا ہے تو اپنی مرضی کے مطابق قانون لاتا ہے‘

انہوں نے کہا کہ ’حسبہ بل میں کوئی بھی خاص بات نہیں اور نہ اس سے صوبہ میں کوئی تبدیلی آنے والی ہے۔ اتنا ہے کہ حکومت اس کے ذریعے سے مولویوں کو نوازنا چاہتی ہے‘۔

بشیر بلور نے کہا کہ متحدہ مجلس عمل درحقیقت اسلام کے نفاذ میں مخلص نہیں بلکہ وہ اس قانون کے ذریعے سے مولویوں کو نوکریاں دلوانا چاہتی ہے تاکہ اپنے لوگوں کو نوازا جائے۔

اس موقع پر بی بی سی اردو ڈاٹ کام سے بات کرتے ہوئے غیرسرکاری تنظیم عورت فاؤنڈیشن میں پروگرام کوراڈنیٹر صائمہ منیر نے کہا کہ ’اس ملک میں دوسرے اداروں کا وجود نہیں تھا کہ مولوی حضرات نے ایک اور ادارہ قائم کر دیا۔ مجھے یہ سمجھ نہیں آتا کہ ہمارا یہ صوبہ ہے یا کوئی تجربہ گاہ ، ہر کوئی آتا ہے تو اپنی مرضی کے مطابق قانون لاتا ہے‘۔

انہوں نے کہا کہ اس قانون کے نفاذ سے عوام کی نجی زندگی متاثر ہوگی کیونکہ اس بل میں ہے کہ لوگوں کو اسلامی شعائر کے مطابق زندگی گزارنا ہوگی۔

واضع رہے کہ حسبہ بل کی منظوری کے خلاف پشاور میں خواتین کا یہ دوسرا مظاہرہ تھا۔ اس سے پہلے گزشتہ روز اس قسم کا ایک مظاہرہ پشاور ہائی کورٹ کے خواتین وکلاء کی کی جانب سے منعقد کیا گیا تھا۔