علی سلمان بی بی سی اردو ڈاٹ کام، لاہور

	کیبل آپریٹرز کے احتجاج کی وجہ سے سکرین خالی

لاہور کے ایک بڑے کیبل نیٹ ورک ورلڈ کال نے پچانوے میں سے چوہتر چینل بند کر دیے ہیں۔

بند کیئے جانے والے چینل میں نیوز، سپورٹس اور تفریح کے تقریبا تمام بڑے پاکستانی نجی چینل بھی شامل ہیں۔ البتہ دکھائے جانے والے چینلز میں سے ایک سرکاری چینل پی ٹی وی بھی شامل ہے۔

پاکستان کے بعض کیبل آپریٹرز اس سال کے بجٹ میں ان پر لاگو کیئے جانے والے ایک نئے ٹیکس کے خلاف احتجاج کر رہے ہیں۔

کیبل آپریٹرز ایسوسی ایشن کا کہنا ہے کہ ایک ہفتے تک وہ روزانہ شام سات سے رات دس بجے تک پاکستان ٹیلی ویژن اور چند ایک ان ہاؤس چینلز کے سوا کوئی نیوز اور تفریحی چینل نہیں دکھائیں گے۔

پنجاب کیبل آپرٹیر ایسوسی ایشن کے صدر ریٹائرڈ کپیٹن عبدالجبار نے کہا کہ اگر حکومت نے ٹیکس واپس نہ لیا تو وہ کاروبار بند کرنے پر مجبور ہوجائیں گے۔

اس سے پہلے پاکستان کے مختلف ٹی وی

کیبل آپریٹرز کے لیے اپنی فیس وصول کرنا مشکل ہے تو اب ان کے لیئے یہ ٹیکس وصول کرکے حکومت کو ادا کرنا محال ہوگا۔ ریٹائرڈ کپیٹن عبدالجبار

ایسوسی ایشن کے صوبائی صدر کا مطالبہ تھا کہ کم از کم کیبل آپرٹیرز کو ٹیکس وصول کنندہ نہ بنایا جائے۔ انہوں نے بی بی سی سے گفتگو کرتے ہوئے کہا کہ کیبل آپریٹرز کے لیے اپنی فیس وصول کرنا مشکل ہے تو اب ان کے لیئے یہ ٹیکس وصول کرکے حکومت کو ادا کرنا محال ہوگا۔

کیبل آپریٹرز ایسوسی ایشن کا کہنا ہے کہ ملک بھر میں ان کے کوئی پچاس لاکھ صارفین ہیں جو اس ٹیکس سے متاثر ہوں گے کیونکہ ان کے بقول بہرحال یہ ادائیگی عام صارف نے ہی کرنی ہے۔

لیکن لاہور کے علاقے اقبال ٹاؤن میں کیبل آپریٹر ایسوسی ایشن کے دفتر میں آنے والے ایک صارف محمد احسن کو پچیس روپے کا اضافی ٹیکس دینے پر کوئی اعتراض نہیں تھا ان کا کہنا تھا کہ جب وہ ڈیڑھ یا دو سوروپے ماہانہ فیس کیبل آپریٹرکو دیتے ہیں تو پھر اضافی پچیس روپے ادا کرنے میں انہیں کوئی عار نہیں ہے۔

محمد احسن لاہور کے متوسط علاقے سے تعلق رکھتے ہیں۔ کیبل آپریٹرز ایسوسی ایشن آف پاکستان کے سیکرٹری جنرل عمران ندیم کا کہنا ہے کہ ان کے زیادہ تر صارفین غریب اور پسماندہ علاقوں میں ہیں اور کیبل لگوانے والا ہر صارف اضافی پچیس روپے اداکرنے کی سقت نہیں رکھتا۔

لیکن ایک سوال کے جواب میں انہوں نے کہا کہ اگر تمام صارف بخوشی ٹیکس ادا کرنے کو تیار ہوگئے تو یہ تحریک خود بخود ختم ہوجائے گی۔