ادریس بختیار بی بی سی کراچی

	بجلی کے بحران پر ہنگامے بھی ہو رہے ہیں

یہ ایک روز کی کہانی نہیں، آئے دن کا قصہ ہے۔ اور بجلی کا جانا اپنی مرضی سے، اور آنا بھی، کسی ایک علاقے تک محدود نہیں ہے۔ سارا شہر اس آنی جانی کی لپیٹ میں ہے۔ سب ہی بلبلا رہے ہیں۔

سارے شہر پر محیط یہ مشکل کب ختم ہوگی؟ کب بچے امتحان کی تیاری کسی مشکل کے بغیر کرسکیں گے؟ کب دفتر والوں سے میں یہ کہ سکوں گا آج میں نے نیند پوری کی ہے، بتائیں کیا کام ہے؟؟

پھر کسی وقت، آدھبی رات اِدھر اور آدھی اُدھر ، بجلی آگئی پنکھے چل گئے۔ گھر والے اور میں خود اپنے اپنے بستر پر براجمان کہ کچھ سولیں کل دن میں بھی بہت کام ہیں۔ مجھے دفتر اور بچوں کو اسکول کالج اور اپنے دفاتر جانا ہے ۔ کچھ نیند ہی لے لیں۔ ابھی آنکھ لگی ہی ہے کہ پنکھے بند ہوگئے اور ساتھ ہی ذرا سے وقفے سے، پورا گھر شور سے بھر گیا۔ آس پاس کے گھروں میں جنریٹر چلنے لگے۔ ہم سب تڑپ کر اٹھ بیٹھے۔ گرمی اتنی زیادہ ہے کہ پنکھے کے بغیر سونا محال کیا ناممکن ہے۔ ابھی آجائےگی، میری بیٹی نے تسلی دی۔

انتظار شروع ہے، آنکھ اندھیرے میں پنکھے پر لگی ہے۔ اور انتظار طویل ہوتا جارہا ہے، ایک گھنٹہ، دو گھنٹے -- آٹھ گھنٹے ، دس گھنٹے --- نہ بجلی آئی نہ نیند لے سکے ۔ دوسرا دن ہوگیا۔ نہ اسکول نہ کالج نہ دفتر۔ نیند پوری ہو تو آدمی اس قابل ہوسکے کہ کچھ کام کرے۔

یہ آئے دن کی کہانی ہے۔ یہ روز روز کا قصہ ہے ۔

اور کل یوں بھی ہوا کہ گاڑی چلاتے چلاتے اچانک مجھے مخالف سمت سے آنے والی گاڑیاں نظر آئیں۔ ابھی میں ٹریفک کی اس خلاف ورزی پر غصے کا اظہار کر ہی رہا تھا کہ سامنے لوگوں کا پتھراؤ کرتا ، شور مچاتا ، ہجوم نظر آیا۔ وہ بجلی کمپنی کے دفتر کے باہر احتجاج کررہے تھے ان کے علاقے میں بھی بجلی پچھلے کئی گھنٹے سے بند تھی۔

بجلی کے جانے کا کوئی وقت طے نہیں ہے۔ صبح بھی جاتی ہے، شام بھی اور رات کو بھی، گھنٹوں گھنٹوں کے لئے ۔ اور یہ کسی ایک علاقے تک محدود نہیں، سب ہی متاثر ہیں۔ لوگ بھی پریشان ہیں، میں بھی پریشان ہوں۔

سارے شہر پر محیط یہ مشکل کب ختم ہوگی؟ کب بچے امتحان کی تیاری کسی مشکل کے بغیر کرسکیں گے؟ کب دفتر والوں سے میں یہ کہ سکوں گا آج میں نے نیند پوری کی ہے، بتائیں کیا کام ہے؟؟