ریاض سہیل بی بی سی اردو ڈاٹ کام ،کراچی

	تربت سے گمشدہ بلوچ لکھاری ڈاکٹر شریف بلوچ کی والدہ، والد اور بہنوں نے اس موقع کر بھوک ہڑتال بھی کی

ہفتے کی صبح سے ریلیوں کا سلسلہ شروع ہوا جو شام تک جاری رہا۔

یہ ریلیاں بلوچستان آپریشن، کالاباغ ڈیم کی تعمیر، جبری مشقت اور اوکاڑہ زرعی فارمز میں مزارعوں پر مظالم کے خلاف نکالی گئیں۔ ساتھ ساتھ امریکی جارحیت کے خلاف اور دنیا میں امن کے لیئے بھی ریلی نکالی گئی۔

فورم کے داخلی دروازے کے سامنے بلوچستان کی سماجی تنظیوں نے احتجاج کیا، مظاہرین پاک فوج کے خلاف بھی شدید نعرے بازی کر رہے تھے۔

تربت سے گمشدہ بلوچ لکھاری ڈاکٹر شریف بلوچ کی والدہ، والد اور بہنوں نے اس موقع کر بھوک ہڑتال بھی کی۔

ڈاکٹر شریف کی والدہ نسیمہ بلوچ نے بی بی سی سے بات کرتے ہوئے بتایا کہ
شریف کو اٹھارہ نومبر کو تربت کے ایک مقامی ہوٹل سے اس وقت گرفتار کیا گیا تھا جب وہ اپنے دوستوں کے ساتھ بیٹھا ہوئے تھے۔

انہوں نے بتایا کہ دو میجروں کی سربراہی میں اہلکاروں نے گرفتاری سے قبل دریافت کیا کہ ڈاکٹر حنیف شریف کون ہے۔ شناخت کے بعد وہ انہیں اپنے ساتھ لے گئے۔

انہوں نے کہا کہ ڈاکٹر شریف کا قصور یہ ہے کہ وہ اپنے حقوق کی بات کرتے ہیں اور کہتے ہیں کہ بلوچستان اور بلوچوں کو ان کا حق دیا جائے۔

نسیمہ بلوچ کے مطابق شریف کی گرفتاری کو چار مہینے ہوگئے ہیں مگر کوئی پتہ نہیں ہے کہ وہ کہاں ہیں، زندہ ہیں یا ہلاک کر دیئے گئے ہیں۔

انجمن مزارعین اوکاڑہ کی جانب سے نکالی گئی ریلی کے مقررین کا کہنا تھا کہ مزارعوں پر آج بھی مظالم جاری ہیں اور اوکاڑہ کی زمین مالکانہ حقوق پر مزارعوں کو دی جائے۔

اس طرح کالا باغ ڈیم پر عوامی تحریک کی جانب سے نکالی گئی ریلی کے شرکاء کا کہنا تھا کہ آج بھی جنرل مشرف کالاباغ ڈیم کی تعمیر پر بضد ہے اور سندھی قوم کو پسماندگی کی طرف دھکیلا جارہا ہے۔

فورم کے موقع پر جبری شادی اور عزت کے نام پر قتل کے خلاف تھیٹر بھی پیش کیئے گئے۔