عدنان عادل بی بی سی اردو ڈاٹ کام، مانسہرہ

کوہستان کے کئی علاقوں تک کوئی پہنچ ہی نہیں سکا ہے

بٹ گرام اور کوہستان سے آنے والی اطلاعات کے مطابق بدھ کی صبح تک ان جگہوں پر ملبہ تلے دبی انسانی لاشوں سے تعفن پھوٹ رہا تھا اور غذا نہ ہونے کی وجہ سے لوگ بھوک سے نڈھال تھے۔ شنکیاری، بٹل، جیوڑی، بھشام، تحصیل الائی اور بھوگڑ منگ زلزلہ سے شدید متاثر ہونے والے علاقے ہیں۔

ایبٹ آباد میں لائنز کلب کے صدر تراب خان جدون نے بتایا کہ ذرائع ابلاغ اور حکومت کی ساری توجہ کشمیر اور بالاکوٹ پر مرکوز رہی جس وجہ سے ہزارہ کے سینکڑوں دور دراز کے تباہ حال دیہات میں امداد نہیں دی جاسکی۔ صوبہ سرحد کے وزیر سراج الحق نے کہا ہے کہ زلزلہ سے صوبہ میں ہزارہ کے علاقہ کے پانچ سو دیہات متاثر ہوئے ہیں۔

مقامی لوگوں کے مطابق تھا کوٹ کے پل کے بعد شروع ہونے والا علاقہ زمین کے بہاؤ کی وجہ سے رضا کارانہ نجی امدادی کاروائیوں کے لیے موزوں نہیں اور یہاں پر حکومت ہیلی کاپٹروں کے ذریعے ہی مدد پہنچا سکتی ہے۔ شمالی علاقہ جات اور کشمیر کے وفاقی وزیر فیصل صالح حیات نے کہا ہے کہ امدادی کاروائیوں میں سینتیس ہیلی کاپٹر حصہ لے رہے ہیں۔

مانسہرہ اور کوہستان کے درمیان واقع ضلع بٹ گرام میں بھی بٹل اور سلونہ جیسے مقامات زلزلہ سے تقریبا مکمل طور پر تباہ ہوچکے ہیں۔ بعض لوگ ان علاقوں سے پیدل چل کر شاہراہ ریشم تک آرہے ہیں اور وہاں سے گاڑیوں میں بیٹھ کر مانسہرہ کی ظفر گراؤنڈ میں بنائے گئے ریلیف کیمپ میں پہنچ رہے ہیں۔

ایبٹ آباد، راولپنڈی اور ملحق علاقوں میں کرائے کی مسافر گاڑیوں او ٹرکوں کی کمی کا سامنا ہے۔ ٹرک مالکان نے کرایوں میں دو سو فیصد تک اضافہ کردیا ہے۔ متاثرہ علاقوں میں کئی جگہوں سے اطلاعات مل رہی ہیں کہ امدادی سامان سے بھری گاڑیوں کو لوگوں نے زبردستی روک کر سامان چھین لیا۔