ریاض سہیل بی بی سی اردو ڈاٹ کام، کراچی

کراچی میں مسائل نہ حل ہوتے ہیں نہ ختم

بلدیاتی انتخابات کے شیڈیول کے اعلان سے ایک دن قبل کراچی پریس کلب میں میٹ دی پریس سے خطاب کرتے ہوئے سٹی ناظم نےکہا کہ کراچی کو بڑا شہر ہونے کی وجہ سے نظر انداز کیاگیا ہے، جس نے یہاں احساس محرومی کو جنم دیا ہے۔

بلدیاتی انتخابات کا اعلان جمعرات کے روز متوقع ہے۔

انہوں نےکہا کہ اس شہر میں انیس سو پچاسی میں فسادات کرائےگئے، جن میں کئی لوگوں کی جانیں ضایع ہوئیں۔

نعمت اللہ خان نے بتایا کہ کچھ لوگوں کہتے ہیں کہ باہر سے لوگوں کو کراچی میں آنے نہ دیا جائے مگر میں کہتا ہوں کہ یہ شہر ان کا بھی ہے اور ان کا بھی حق بنتا ہے۔

انہوں نےگورنر سندھ اور وزیراعلیٰ پر تنقید کی اور کہا کہ پنجاب کا گورنر اور وزیر اعلیٰ لاہور کو اپنا گھر سمجھتے ہیں مگر ہمارے ہاں ایسا نہیں ہے۔

سٹی ناظم نے کہا کہ ’مجھے بلدیاتی انتخابات کی مہم چلانے کی کیا ضرورت ہے۔ میں نے ترقیاتی کام کرائے ہیں۔ مہم وہ چلائیں جنہوں نے کام نہیں کرائے‘۔

نعمت اللہ نے کہا کہ کراچی میں ہونے والے کاموں کی ملک بھر میں پذیرائی ہوئی ہے۔

’ کراچی میں ایک سو اٹھہتر یونین کاؤنسلز ہیں۔ ہم نے پہلے سال ان کو پینتیس لاکھ، دوسرے سال چونسٹھ لاکھ اور تیسرے سال ایک سو بہتر لاکھ روپے دیے ہیں۔ پانچ سو سے زائد کچی آبادیوں کو مستقل کیا جو سب سے بڑا مسئلہ بنی ہوئیں تھیں‘۔