حکومت نے عبدالقدیر خان کی نقل و حرکت پر پابندی عائد کر رکھی ہے۔

پاکستانی فوج کے ترجمان میجر جنرل شوکت سلطان نے کہا ہے کہ دو روز قبل جوہری سائنسدان ڈاکٹر عبدالقدیر خان کو دل کی تکلیف ہوئی تھی جس کے بعد ڈاکٹروں نے ان کو انجیوگرافی کا مشورہ دیا ہے۔

شوکت سلطان نے بی بی سی سے بات کرتے ہوئے کہا کہ ڈاکٹر خان اپنے گھر پر ہی ہیں اور ان کو ہسپتال نہیں لے جایا گیا۔فوج کے ترجمان کے مطابق ڈاکٹر خان کی صحت مستحکم ہے اور ان کا ڈاکٹروں نے تفصیلی معائنہ کیا ہے۔

فوج کے ترجمان کے مطابق ان کی اینجیوگرافی آیندہ چند روز میں ہو گی۔

ڈاکٹر خان کے صحت کے بارے میں ان کی نظر بندی کے حوالے سےگذشتہ ایک سال میں کافی قیاس آرائیاں ہوتی رہی ہیں مگر حکومت نے ہمیشہ اس بات سے انکار کیا تھا کہ ان کی صحت کو کوئی خطرہ ہے۔

مگر اب حکومت نے اعتراف کیا ہے کہ وہ دل کی تکلیف میں مبتلا ہیں اور ان کی اینجیوگرافی ہو گی۔

پاکستان کے جوہری پروگرام کے بانی کہلائے جانے والے ڈاکٹر عبدالقدیر خان جن کو گذشتہ برس فروری میں ان کے اس اعتراف کے بعد جس میں انہوں نے شمالی کوریا، لیبیا اور ایران کے جوہری پروگرام میں مدد دی تھی، ان کے گھر میں نظر بند کر دیا گیا تھا۔

ڈاکٹر خان کے مبینہ جوہری نیٹ ورک کے بارے میں گذشتہ برس سے ملکی اور بین الاقوامی ذرائع ابلاغ میں رپورٹیں شائع ہوتی رہی ہیں جن میں کہا گیا ہے کہ امریکہ اور بین الاقوامی جوہری جوہری توانائی کی ایجنسی آئی اے ای اے ڈاکٹر عبدالقدیر خان تک خود رسائی حاصل کر کے معلومات حاصل کرنا چاہتی ہیں مگر پاکستان کے صدر جنرل پرویز مشرف ابھی تک کسی بھی غیر ملکی ادارے یا ملک کی طرف سے ڈاکٹر قدیر سے تفتیش کی اجازت نہیں دے رہے۔