مبشر زیدی بی بی سی اردو ڈاٹ کام،اسلام آباد

امرتسر سے ننکانہ صاحب تک سڑک بنانے کا کام پہلے ہی شروع ہو چکا ہے

ان مذاکرات کے اختتام پر ایک مشترکہ اعلامیہ جاری کیا گیا ہے جس میں کہا گیا ہے کہ بھارت کے سکھ یاتریوں کے لئے امرتسر سے ننکانہ صاحب تک بس سروس شروع کرنے پر بھی اتفاق ہو گیا ہے۔

اعلامیے میں مزید کہا گیا ہے کہ دونوں ممالک کے حکام نے امرتسراور لاہور کے درمیان بس سروس کے روٹ، بس ٹرمینلز(اڈوں) ، بس کے علمے اور ویزا کے معاملات پر بات کی ہے اور اس معاملے پر مذید بات چیت نئی دہلی میں دو ماہ کے اندر ہو گی۔

امرتسر سے ننکانہ صاحب تک بس سروس کے شروع کرنے کی تاریخ اور دیگر معاملات پر بھی بات چیت دہلی میں ہو گی۔

دونوں ممالک کے حکام نے اس بات سے انکار کیا ہے کہ اس بات چیت میں لاہور اور امرتسر کے درمیان بس سروس شروع کرنے کی تاریخ کے بارے میں دونوں ممالک میں کچھ اختلافات ہیں۔

پاکستانی وفد کے سربراہ محمد عباس نے کہا کہ بس سروس کی تاریخ کے لئے دونوں ممالک کی ٹرانسپورٹ حکام جلد ہی آپس میں بات کریں گی جس کے بعد اس بس سروع کو شروع کرنے کی تاریخ اور دیگر معاملات طے کئے جائیں گے۔

بھارتی وفد کے سربراہ آلوک راوت نے کہا کہ ایک بس سروس کو چلانے کے لئے کچھ معاملات طے کئے جاتے ہیں۔انہوں نے کہا کہ اس بس سروس کو شروع کرنے پر اتفاق ہوا ہے اور دیگر معاملات بھی جلد ہی طے ہو جائیں گے۔