پشاور میں ہنگاموں کے دوران فوج کا گشت

کوئٹہ میں مکمل ہڑتال رہی اور سڑکیں ویران پڑی رہیں جبکہ گورنر بلوچستان کے قافلے پر پتھراؤ اور ان کے خلاف نعرہ بازی کی اطلاعات موصول ہوئی ہیں۔

کراچی میں مختلف مقامات پر متعدد گاڑیوں کو بھی نذر آتش کر دیا گیا ہے اور پشاور چھاونی میں ہنگامے اور پولیس کے ساتھ جھڑپیں ہونے کی اطلاعات موصول ہوئی ہیں۔

سندھ پونم کے صدر قادر مگسی نے کہا ہے کہ سندھ، بلوچستان، سرحد میں مکمل اور پنجاب کے سرائیکی علاقوں مظفر گڑھ اور ڈیرہ غازی خان میں جزوی ہڑتال ہونے کی اطلاعات ملی ہیں۔

انہوں نے کہا کہ اس ہڑتال سے ثابت ہو گیا ہے کہ عوام اور خاص طور پر پاکستان کی محکوم قومیں اسلام آباد کی پالیسوں پر نہ خوش ہیں۔ انہوں نے کہا کہ یہ ہڑتال کالا باغ ڈیم، گیٹر تھل کینال، بلوچستان میں مبینہ فوجی آپریشن اور ان تمام زیادتیوں کے خلاف ہے جن کا عوام کو سامنا ہے۔

ان مظاہرین نے نجی اور سرکاری املاک کو نقصان پہنچایا۔ اس موقع پر پولیس نے مظاہرین کو منتشر کرنے کے لیے لاٹھی چارج کیا اور آنسو گیس کے گولے پھینکے۔ اس موقع پر فوج بھی موجود تھی۔ مظاہرے کے دوران ہوائی فائرنگ بھی ہوئی لیکن کسی جانی نقصان کی اطلاع نہیں ملی۔

مظاہرین کی توڑ پھوڑ کو روکنے کے لیے پولیس نے حالات پر قابو پانے کے لیے فوج کی مدد حاصل کر لی۔ پشاور کی یونیورسٹی روڈ پرصبح سات بجے سے دس بجے تک شدید ہنگامہ آرائی ہوئی اور اس مصروف سڑک پرٹریفک معطل رہی۔

حیدر آباد سے بی بی سی کے نامہ نگار علی حسن کے مطابق سندھ میں بھی پونم کی کال پر ہڑتال ہوئی ہے اور اکثر شہروں میں کاروبارِ زندگی معطل رہا ہے۔ تاہم میرپورخاص، سکھر اور سانگھڑ میں کاروبارِ زندگی معمول کے مطابق چلتا رہا۔ اندرونِ سندھ پولیس نے لوگوں کو ہڑتال پر اکسانے کے جرم کچھ گرفتاریاں بھی کی ہیں۔

کراچی سے صحافی اسد اللہ نے بی بی سی اردو سروس کو بتایا کہ شہر میں پونم کی کال پر جزوی ہڑتال کی گئی اور بعض علاقوں میں ٹریفک معطل رہی۔

اس موقع پر پولیس بھی تعینات رہی

اس موقع پر شہر کے مختلف علاقوں سے دس کے قریب گاڑیوں کے نذر آتش کیے جانے کی اطلاعات ملی ہیں۔ ٹریفک نہ ہونے کے باعث لوگوں کو دفاتر تک پہنچنے میں دشواریوں کا سامنا کرنا پڑا اور تعلیمی اداروں اور دفاتر میں حاضری کم رہی۔

کراچی میں گاڑیوں اور بسیں جلانے کا سلسلہ بدھ کی شام سے ہی شروع ہو گیا تھا جب تین بسوں کو نذر آتش کر دیا گیا تھا۔ جمعرات کی صبح ملیر ہالٹ کے علاقے میں ایک ٹیکسی اور ایک گاڑی کو جلا دیا گیا۔ اس واقعے میں ٹیکسی کا ڈرائیور بھی شدید زخمی ہو گیا۔

نصرت بھٹو کالونی میں کراچی الیکٹرک سپلائی کارپوریشن کی تین گاڑیوں کو آگ لگا دی گئی جب بہادر آباد، سہراب گوٹھ اور سچل کے علاقوں سے بھی گاڑیاں جلانے کی وراداتوں کی اطلاعات ملی ہیں۔گلستان جوہر میں ایک پولیس چیک پوسٹ پر مظاہرین نے حملہ کرکے پولیس کو وہاں سے پسپائی اختیار کرنے پر مجبور کر دیا۔

کو ئٹہ سے بی بی سی اردو ڈاٹ کام کے عزیز اللہ نے خبر دی ہے بلوچستان کے بیشتر علاقوں میں مکمل پہیہ جام ہڑتال ہے جبکہ کاروباری مراکز اور دکانیں بند ہیں۔

یہ ہڑتال گوادر میگا پراجیکٹ، کالا باغ ڈیم اور گریٹر تھل کینال جیسے منصوبوں ، بلوچستان میں چھاونیوں کے قیام اور فوجی کارروائیوں کے خلاف کی جا رہی ہے۔ پونم میں شامل جماعتوں کے علاوہ دیگر سیاسی جماعتیں، تاجر برادری اور ٹرانسپورٹرز کی تنظیمیں بھی اس ہڑتال میں شامل ہیں۔

ہڑتال کے دوران بلوچستان میں تجارتی مراکز بند رہے

کوئٹہ میں مکمل ہڑتال ہے اور سڑکیں ویران پڑی ہیں۔ بعض مقامات پر پولیس اور سیاسی کارکنوں کے مابین آنکھ مچولی جاری ہے۔ سیاسی کارکن دکانیں بند کرانے اور ٹریفک بند رکھنے کی کوشش کر رہے ہیں۔ بعض مقامات سے پولیس اور سیاسی کارکنوں کے مابین پتھراؤ کی اطلاعات موصول ہوئی ہیں۔

بلوچستان نیشنل پارٹی کے سینیٹر ثناء اللہ بلوچ اور پشتونخواہ ملی عوامی پارٹی کے پارلیمانی لیڈر عبدالرحیم زیارت وال نے کہا ہے کہ اندرون سندھ اور صوبہ سرحد کے بیشتر علاقوں میں ہڑتال کامیاب رہی ہے۔ پنجاب کے کچھ علاقوں میں دکانیں بند رکھی گئی ہیں۔

بلوچستا ن کے بیشتر علاقے جیسے لورالائی، چمن، خضدار، سبی، گوادر، تربت ڈیرہ بگٹی وغیرہ میں مکمل ہڑتال ہے۔ جبکہ ڈیرہ اللہ یار اور قریبی علاقوں سے ملنے والی اطلاعات کے مطابق کچھ دکانیں کھلی رہیں اور کچھ گاڑیاں سڑکوں پر چلتی رہی ہیں۔

پشین میں پشتونخواہ ملی عوامی پارٹی کے کارکن یارو تک پیدل مارچ کررہے ہیں۔ اس علاقے میں آج گورنر بلوچستان اویس احمد غنی نے یونیورسٹی کا افتتاح کرنا ہے۔