مبشر زیدی بی بی سی اردو ڈاٹ کام،اسلام آباد

صدر کارزئی نے صدر مشرف سے بھی ملاقات کی

ان معاہدوں پر دستخط کرنے کی تقریب وزیر اعظم ہاؤس میں ہوئی جس میں افغانستان کے صدر حامد کرزئی اور پاکستانی وزیر اعظم شوکت عزیز نے شرکت کی۔

اس سے قبل دونوں رہنماؤں نے دوطرفہ معاملات پر بات چیت کی اور دونوں ممالک کے درمیان دہشت گردی کے خلاف جنگ،خطے کی صورتحال اور تجارتی روابط پر بات کی۔

وزیر اعظم شوکت عزیز نے اس موقع پر کہا کہ انہوں نے افغانی صدر کرزئی کے ساتھ ترکمانستان-افغانستان-پاکستان گیس پائپ لائن کے معاملے پر بھی بات کی ہے۔

اس موقع پر صدر حامد کرزئی نے کہا کہ پاکستان اور افغانستان کے عوام کے درمیان رشتہ اتنا گہرا ہے کہ دونوں حکومتوں کو اس رشتے کی بڑھتی ہوئی رفتار کے ساتھ چلنے میں مشکل آ رہی ہے۔

دونوں ممالک کے درمیان ہونے والے معاہدوں میں ذرائع ابلاغ ، سیاحت ، ثقافت اور دونوں ممالک کے وزرا خارجہ کے درمیان مستقل مشاورت کا ایک پروٹوکول شامل ہے۔

کل صدر حامد کرزئی نے اپنے پاکستانی ہم منصب صدر جنرل پرویز مشرف سے ملاقات کی تھی جس میں دہشت گردی اور منشیات کے خلاف مشترکہ جدوجہد پر اتفاق کیا گیا۔