ہارون رشید
بی بی سی اردو ڈاٹ کام، پشاور |  |
|  پشاور سے ماضی میں بڑی تعداد میں غیرملکی القاعدہ سے تعلق کے شبعہ میں گرفتار کئے جا چکے ہیں |
صوبہ سرحد میں حکام کا کہنا ہے کہ انہوں نے جعرات کی شام صوبائی دارالحکومت پشاور کے ایک مصروف بازار سے ایک غیرملکی کو القاعدہ سے تعلق کے شک میں حراست میں لیا ہے۔ اس تیس سالہ شخص نے حکام کو اپنا نام عبدالقیوم اور تعلق تیونس سے بتایا ہے۔ القاعدہ سے تعلق کے شبہ میں یہ تازہ گرفتاری جمعرات کی شام ٹاؤن کے علاقے میں سی آئی ڈی پولیس نے کی۔ مشتبہ شخص کی عمر تیس بتائی جاتی ہے اور اس کا کہنا ہے کہ وہ کافی عرصے سے پشاور کے مضافات میں ملاکنڈھیری گاؤں میں رہائش پذیر تھا۔ حکام کے مطابق وہ اس شخص پر کافی عرصے سے نظر رکھے ہوئے تھے اور کل اسے اس کے موبائل فون کے ذریعے ٹریک کرکے حراست میں لیا گیا۔ عبدالقیوم کے خلاف الزامات کی تفصیل واضح نہیں ہیں لیکن حکام کے مطابق اسے القاعدہ کے ساتھ تعلق کے شک میں گرفتار کیا گیا ہے۔ پشاور سے ماضی میں بڑی تعداد میں غیرملکی القاعدہ سے تعلق کے شبعہ میں گرفتار کئے جا چکے ہیں لیکن اب وقت کے ساتھ ساتھ اس سلسلے میں کمی آئی ہے۔ اس گرفتاری کے ایک روز بعد جمعہ کو پشاور کے ایک مقامی اردو اخبار میں القاعدہ کے چودہ انتہائی مطلوب افراد کی گرفتاری میں مدد پر انعام سے متعلق اشتہار شائع ہوا ہے۔ اس اشتہار میں القاعدہ کے سربراہ اسامہ بن لادن کے علاوہ طالبان رہنما ملا محمد عمر کی تصاویر بھی شامل ہیں۔ یہ اشتہار پہلے بھی کئی قومی اخبارات میں شائع ہوچکے ہیں۔ گیارہ ستمبر کے واقعات کے بعد پاکستان بھر سے اب تک حکام کے مطابق پانچ سو سے زائد افراد القاعدہ اور طالبان سے روابط کے شک پر گرفتار کر کے امریکہ کے حوالے کئے جا چکے ہیں۔ | 
یہ صفحہ دوست کو ای میل کیجیئے
پرِنٹ کریں
