ندیم سعید بی بی سی اردو ڈاٹ کام، ملتان

اغوا کاروں کی ابھی شناخت نہیں ہو سکی ہے

واپڈا کے واٹر ونگ سے تعلق رکھنے والی ایک جماعت گدو بیراج سے نکالے جانے والے مجوزہ رینی کینال کے سروے کے سلسلے میں راجن پور کے دریائی علاقے شاہ والی گئی ہوئی تھی جب مبینہ طور پر درجن بھر مسلح افراد نے انہیں اغوا کر لیا۔

سروے ٹیم کے مغوی افراد کا تعلق واپڈا کے گدو اور لاہور کے علاقوں سے بتایا جارہا ہے ۔ تاہم مغویوں کی صیح تعداد کے بارے متضاد اطلاعات ہیں ۔پولیس حُکام کے مطابق اغّوا ہونے والوں کی تعداد آٹھ ہے جبکہ گدو میں واپڈا کے ذمّہ داران یہ تعداد گیارہ بتا رہے ہیں ۔

اغوا کاروں کی ابھی شناخت نہیں ہو سکی لیکن ذرائع کے مطابق امکان یہ ہے کہ اغوا کار سندھ اور پنجاب کے کچے کے علاقے میں سرگرم جرائم پیشہ گروہوں میں سے ہوسکتے ہیں۔ جو بلوچستان کے نزدیکی علاقے سوئی میں امن و اماں کی خراب صورت حال سے فائدہ اٹھانا چاہتے ہیں۔

سوئی کو سندھ اور پنجاب سے مِلانے والی سڑک گدو کے پاس سے گزرتی ہے جبکہ سوئی کو پانی اور بجلی کی فراہمی بھی گدو بیراج سے ہوتی ہے ۔