عدنان عادل بی بی سی اردو ڈاٹ کام ، لاہور

پولیس کا دعویٰ ہے کہ آلۂ قتل برآمد کر لیا گیا ہے

پولیس کے مطابق یہ واقعہ تحصیل جڑانوالہ کے نواحی گاؤں 653/4 گ ب میں نصف شب کے بعد صبح دو بجے کے قریب پیش آیا اور اس کی وجہ گھریلو جھگڑا ہے۔

تھانہ لنڈیانوالہ کی پولیس نے بی بی سی کو بتایا کہ ملک رفیق نامی شخص اور اس کے خاندان کے چھ افراد قتل ہوئے ہیں جن میں چار مرد اور تین عورتیں شامل ہیں۔

پولیس کا کہنا ہے کہ ان لوگوں کو پہلے کوئی نشہ آور چیز کھلا کر بے ہوش کیا گیا اور بعد میں استرے سے گردن کاٹ کر قتل کردیا گیا۔

پولیس نے قتل ہونے والے ملک رفیق کے بھتیجے اور داماد ملک اعظم کو شبے میں گرفتار کرلیا ہے اور اس کے پاس سے خون آلود کپڑے اور آلۂ قتل برآمد کرنے کا دعویٰ کیا ہے۔

پولیس کا کہنا ہے کہ ملزم کی اپنے چچا اور سسر سے گھریلو ناچاقی تھی اور جو لوگ قتل ہوئے ہیں ان میں ملزم کی بیوی بھی شامل ہے۔