ممتاز بھٹو نے آصف زرداری کو مرتضیٰ بھٹو کا قاتل کہا تھا

گزشتہ رات سندھی زبان کے اخبارات کے دفاتر میں فیکس کے ذریعے ممتاز بھٹو کا ایک موصول ہوا ہے۔ خط میں لکھا ہوا ہے کہ سندھ استحصال اور روزانہ بڑھتے ہوئے مسائل کے دلدل میں دھنستا چلا جا رہا ہے اور ایسے موقع پر سندھی اخبارات آصف زرداری جیسے شخص کو عظیم بنا کر پیش کر رہے ہیں جو شادی کے ذریعے سیاستدان بنے ہیں۔

ممتاز بھٹو نے لکھا ہے کہ آصف زرداری ضمانت پر رہا ہوئے ہیں جس کا مطلب یہ نہیں ہے کہ وہ قتل کے چار الزامات اور کرپشن کے تیرہ الزامات سے بری الذمہ ہیں۔

اس خط میں، جس میں کئی تحریک آمیز الفاظ استعمال کیے گئے ہیں، ممتاز علی خان بھٹو نے لکھا ہے کسی بھی ایسے شخص کی حیثیت کو بڑھا چڑھا کر پیش کرنا دیانتدارانہ صحافت کے اصولوں کی خلاف ورزی ہے بلکہ یہ اپنی سرزمین سے غداری کے مترادف ہے۔

انہوں نے کہا کہ شادی سے قبل آصف زرداری کی کوئی حیثیت نہیں تھی۔

ممتاز علی بھٹو وہ واحد سیاستدان ہیں جنہوں نے آصف علی زرداری کی رہائی کے بعد ان کے بارے میں کھل کر کہا تھا کہ وہ میر مرتضٰی بھٹو کے قتل میں ملوث ہیں۔

ممتاز علی بھٹو کے اس الزام کا جواب پیپلز پارٹی کے ترجمان نے بھی سخت الفاظ میں دیا تھا۔

آٹھ سال کی قید کے بعد ضمانت پر رہائی کے بعد آصف علی زرداری اندرونِ سندھ کے دورے پر آئے ہوئے تھے اور اس دورے کے دوران انہوں نے لاڑکانہ سمیت مختلف علاقوں کا دورہ کیا تھا۔